वीरगंज । वीरगंज महानगरपालिकाले नगर क्षेत्रमा रहेका मठ–मन्दिर, मस्जिद तथा चैत्य–गुम्बाको संरक्षण र व्यवस्थापनलाई संस्थागत रूपमा अघि बढाउने भएको छ । यसका लागि महानगरले विशेष सम्पदा व्यवस्थापन समिति गठन गरी काम प्रारम्भ गरेको छ।
महानगरले ऐतिहासिक, धार्मिक, सांस्कृतिक र पुरातात्विक महत्वका सम्पदाहरूको दीगो संरक्षण गर्ने उद्देश्यसहित सम्पदा व्यवस्थापनसम्बन्धी ऐन निर्माण गरी कार्यान्वयनमा ल्याएको छ। अब महानगरका ३२ वटै वडामा रहेका सम्पूर्ण धार्मिक सम्पदाको अभिलेख संकलन गरी सूचिकृत गर्ने तयारी गरिएको छ।
समितिको संयोजक नगर प्रमुख राजेशमान सिंह रहनु भएको छ भने उपप्रमुख इम्तियाज आलम, प्रमुख प्रशासकीय अधिकृत अरविन्दलाल कर्ण, वडा अध्यक्ष जगत साह कानु, प्रदीप चौरसिया, कलावती राजपुतिन, श्रीनन्दन मिश्र र जय किशोर पाण्डे सदस्य छन् । शाखा अधिकृत सुशीला देवकोटा सदस्य–सचिवको जिम्मेवारीमा नियुक्त भएकी छिन् । समितिका सदस्यहरूलाई एक औपचारिक कार्यक्रममार्फत पत्र हस्तान्तरण गरी जिम्मेवारी प्रदान गरिएको हो ।
नगर प्रमुख सिंहले धार्मिक सम्पदाहरू व्यवस्थित र पारदर्शी रूपमा सञ्चालन गर्न अनिवार्य रूपमा सूचिकृत गरिने बताए । हाल महानगरभित्र कतिपय सम्पदाहरू व्यक्तिगत स्वार्थअनुसार मनपरी ढंगले सञ्चालन हुँदै आएको उल्लेख गर्दै उनले अब ती सम्पदाहरूलाई नियमन गर्ने र भक्तजनले चढाएको दान–चन्दा दुरुपयोग हुन नदिन कडा प्रावधान लागू गरिने जानकारी दिए ।
सिंहले भने, “हाम्रो उद्देश्य सम्पदाको संरक्षण मात्र होइन, पारदर्शिता र धार्मिक संस्थाहरूको दीगो विकास सुनिश्चित गर्नु हो । भक्तजनले गरेको दान–चन्दा त्यही सम्पदाको संरक्षण तथा संवर्द्धनमै खर्च हुने वातावरण सिर्जना गर्नुपर्छ ।”
समितिले आगामी दिनमा सम्पदाहरूको लगत संकलन गरी सार्वजनिक गर्ने र त्यसका आधारमा दीर्घकालीन संरक्षण तथा व्यवस्थापन कार्यक्रम सञ्चालन गर्ने योजना बनाएको छ । यसबाट धार्मिक, सांस्कृतिक तथा ऐतिहासिक सम्पदाको दीगो संरक्षणसँगै शहरको पहिचान सुरक्षित हुने विश्वास महानगरले गरेको छ ।
