वीरगंज । विद्यालय शिक्षा विधेयकलाई बिहीबार अन्तिम रूप दिने तयारी भइरहेका बेला देशभरका निजी विद्यालय सञ्चालकहरू विरोधमा उत्रिएका छन् । सोही सन्दर्भमा निजी तथा आवासीय विद्यालय सञ्चालकहरूको छाता संगठन प्याब्सन, एनप्याब्सन, हिसान, अपेनलगायतका संस्थाहरूको आव्हानमा काठमाडौंको माइतीघर मण्डलामा विद्यालय सञ्चालक, प्रिन्सिपल तथा शिक्षकहरूले प्रदर्शन गरेका हुन्।
‘गैरनाफामूलक चाहिँदैन, कम्पनी मास्न पाइँदैन’, ‘पूर्ण छात्रवृत्ति लाद्न पाइँदैन, निजी विद्यालय मास्न पाइँदैन’, ‘निजी विद्यालयको योगदान, मजबुत अर्थतन्त्रको निर्माण’, ‘अभिभावकको पहिलो रोजाइ, निजी विद्यालयको पढाइ’ जस्ता नारा लेखिएका प्लेकार्ड बोकेर उनीहरूले सरकारको ध्यानाकर्षण गराए।
सो कार्यक्रममा पर्साबाट पनि विद्यालय सञ्चालकहरूको प्रतिनिधि टोली काठमाडौं पुगेको थियो। केन्द्रीय सदस्य छेडुप लामा, प्याब्सन पर्साका अध्यक्ष सरोज चौधरी, वीरगंज महानगर अध्यक्ष राहुल श्रीवास्तव, जिल्ला सदस्य शुल्भ केसी, विजय कुमार बललगायतको नेतृत्वमा टोलीले ब्यानरसहित शान्तिपूर्ण प्रदर्शनमा सहभागिता जनाएको हो ।
विद्यालय सञ्चालकहरूले सरकारले ल्याउन लागेको शिक्षा विधेयकले निजी विद्यालयहरूको अस्तित्व नै संकटमा पार्ने खालका प्रावधान राखेको आरोप लगाएका छन्। उनीहरूले निजी विद्यालयलाई कम्पनीका रूपमा चलाउने अधिकार खोस्ने, जबर्जस्ती पूर्ण छात्रवृत्ति लाद्ने र गैरनाफामूलक बनाउन खोज्ने जस्ता व्यवस्था अस्वीकार्य भएको स्पष्ट पारे।
“निजी विद्यालयहरूले दशकौँदेखि देशमा गुणस्तरीय शिक्षा, रोजगारी सिर्जना र अर्थतन्त्रमा ठूलो योगदान दिएका छन्। तर सरकारले त्यसलाई नमान्ने खालको व्यवहार गरिरहेको छ,” उनीहरूको भनाइ थियो।
सञ्चालकहरूले शिक्षा विधेयकलाई पुनर्विचार गरी सरोकारवालासँग पर्याप्त छलफल गरेर मात्र अघि बढाउन सरकारलाई आग्रह गरेका छन्।
