वीरगंज । गृह मन्त्रालय मातहतका २० सहसचिव र २४ उपसचिवको एकै पटक सरुवा भएको छ । गृहमन्त्री रमेश लेखकको निर्णयअनुसार सरुवा प्रक्रियामा पर्सासहित काठमाडौँ उपत्यकाका तीनै जिल्लाका प्रमुख जिल्ला अधिकारी (सीडीओ) हेरफेर भएका छन् ।
पर्साका प्रमुख जिल्ला अधिकारी गणेश अर्याललाई मन्त्रालयमा फिर्ता बोलाइएको छ । उहाँको स्थानमा हाल पाल्पाका सीडीओ तोय नारायण सुवेदीलाई पठाइने भएको छ ।
यस्तै, काठमाडौँका प्रमुख जिल्ला अधिकारी ऋषिराम तिवारीलाई मन्त्रालयको आन्तरिक व्यवस्थापन महाशाखामा पठाइएको छ भने मन्त्रालय प्रशासन महाशाखामा कार्यरत छविलाल रिजाललाई काठमाडौँको प्रमुख जिल्ला अधिकारीको जिम्मेवारी दिइएको छ ।
मन्त्रालयको आन्तरिक व्यवस्थापन महाशाखा प्रमुखको जिम्मेवारी जयनारायण आचार्यलाई दिइएको छ भने उहाँलाई प्रशासन महाशाखामा खटाइएको छ ।
यस सरुवाले गृह मन्त्रालय र मातहतका विभिन्न प्रशासनिक कार्यालयमा महत्वपूर्ण नेतृत्व तहमा व्यापक फेरबदल ल्याएको छ ।
