वीरगंज । वीरगंज महानगरपालिकाका नगर प्रमुख राजेश मान सिंगको निर्देशनअनुसार सामाजिक सुरक्षा भत्ता प्राप्त गर्ने सेवाग्राहीहरूको Biometric Verification (VERSP-MIS) प्रणालीमार्फत नविकरणको घरदैलो सेवा वडा नं. ५ मा सफलतापूर्वक सम्पन्न भएको छ।
वडा कार्यालयमा उपस्थित हुन नसक्ने वृद्ध–वृद्धा, अपाङ्ग र अस्वस्थ सेवाग्राहीलाई लक्षित गरी यो कार्यक्रम सञ्चालन गरिएको हो। वडा नं. ५ का अध्यक्ष प्रदीप चौरसियाको नेतृत्वमा सम्पन्न कार्यक्रममा सम्पूर्ण निर्वाचित जनप्रतिनिधिहरू, महानगरपालिकाको पंजिकरण शाखा प्रमुख बुद्धि माया थापा, वडा सचिव अरुण बस्नेत, तथा कम्प्युटर अपरेटर करिना श्रेष्ठ, आशिष कुश्वाहा, सन्जु दहाल, मनोज साह, मन्जु परियार र रुस्तम अलीको सक्रिय सहभागिता रहेको थियो।
अभियानअन्तर्गत सेवाग्राहीहरूको घरमै पुगेर बायोमेट्रिक विवरण संकलन गरी नविकरण प्रक्रिया सम्पन्न गरिएको हो। यस पहलले सेवाग्राहीलाई कार्यालय धाउनुपर्ने बाध्यता हटाई घरमै सेवा उपलब्ध गराउने सुविधा दिलाएको छ। साथै सामाजिक सुरक्षा भत्ता वितरणमा पारदर्शिता र विश्वसनीयता सुनिश्चित हुने अपेक्षा गरिएको छ।
