वीरगंज । “सीप सिकौँ, आत्मनिर्भर बनौँ” भन्ने नारासहित लायन्स क्लब अफ वीरगंज सेन्ट्रलको सहयोगमा वीरगंज–९ रानीघाटस्थित जीवन ज्योति स्कूलमा सोमबारदेखि १५ दिने सीपमूलक तालिम सुरु भएको छ।
तालिममा ३५ जना विद्यार्थीहरूको सहभागिता रहेको छ । विद्यालय प्रशासनका अनुसार, तालिमको उद्देश्य विद्यार्थीलाई सीपमूलक ज्ञान प्रदान गरी भविष्यमा आत्मनिर्भर बन्ने क्षमता विकास गर्नु हो ।
१५ दिनसम्म दैनिक एक घण्टा सञ्चालन हुने तालिममा सहभागी विद्यार्थीलाई कुसन र डल (गुड़िया) बनाउने कला सिकाइँदैछ। तालिमको प्रशिक्षण महिला जागृति मिसनकी प्रशिक्षक नीतु श्रेष्ठले दिइरहेकी छिन्।
कार्यक्रमलाई सम्बोधन गर्दै लायन्स क्लब अफ वीरगंज सेन्ट्रलकी अध्यक्ष रेखा वैद्यले सीपमूलक तालिमले विद्यार्थीमा सीप विकासका साथै सामाजिक जिम्मेवारीबोध पनि जगाउने विश्वास व्यक्त गरिन्। उनले लायन्स क्लब सधैँ सामाजिक कार्यमा अग्रणी रहँदै आएको उल्लेख गर्दै यस्ता रचनात्मक कार्यक्रमलाई निरन्तरता दिने प्रतिबद्धता जनाइन्।
विद्यालय प्रशासनले तालिम पूरा भएपछि सहभागीलाई प्रमाणपत्र वितरण गर्ने र उत्कृष्ट प्रदर्शन गर्ने विद्यार्थीलाई पुरस्कृत गर्ने जानकारी दिएको छ।
कार्यक्रममा लायन्स क्लबकी जोन चेयरपर्सन रोमिन्द्र कौर, सचिव हर्षा वैद्य, सिता अग्रवाल, पूजा पोद्दार, कविता हलानलगायतको उपस्थिति रहेको थियो।
