जनकपुरधाम । जनकपुरमा पत्रकारमाथि आक्रमण गर्ने वकिलहरूविरुद्ध कानुनी कारबाहीको मागसहित पत्रकारहरूले आज धर्ना दिएका छन्।
नेपाल पत्रकार महासंघ धनुषा शाखाको नेतृत्वमा पत्रकारहरूले जिल्ला प्रशासन कार्यालय धनुषाको मूल गेट अगाडि बिहान ११ बजेदेखि धर्ना सुरु गरेका हुन्। उनीहरूले “आक्रमण गर्ने वकिललाई कारबाही गर”, “प्रेस स्वतन्त्रताको रक्षा गर”, “पत्रकारलाई सुरक्षा देऊ” लगायतका नारा लेखिएका प्लेकार्डसहित विरोध जनाएका थिए।
गत साउन २७ गते गुठी संस्थानबाट कानुनी प्रक्रिया पूरा गरी महासंघले लिजमा लिएको ४ कठ्ठा जग्गा संरक्षण गर्ने क्रममा नेपाल बार एसोसिएसन जनकपुरका पदाधिकारीसहितका वकिलहरूले पत्रकारमाथि आक्रमण गरेका थिए।
आक्रमणमा संलग्न वकिलहरूलाई कानुनी दायरामा ल्याउनुपर्ने माग गर्दै पत्रकारहरूले निरन्तर दबाबमूलक आन्दोलन गर्ने चेतावनी दिएका छन्।
