वीरगञ्ज । पर्साको जगरनाथपुर गाउँपालिकाले खाली पर्ती, खोलाको बगर, उपयोगविहीन ऐलानी तथा सार्वजनिक जग्गामा वृक्षारोपण अभियानलाई तिव्रता दिइरहेको छ।
यसैक्रममा, वडा नं. २ दशौतास्थित नदिको बगरमा रहेको करिब १० बिघा उपयोगविहीन जग्गामा शुक्रबार २७ प्रजातिका १० हजारभन्दा बढी अमला, आँप, लिच्ची, कटहर, जामुन, कदम, पिपल, बर, मसला, खयर लगायतका विरुवा रोपिएको गाउँपालिका अध्यक्ष श्रीकान्त प्रसाद यादवले जानकारी दिए।
शुक्रबारको वृक्षारोपण कार्यक्रमको उद्घाटन पूर्व उद्योग, वाणिज्य तथा आपूर्ति मन्त्री रमेश रिजालले गरेका थिए। गाउँपालिका अध्यक्ष यादवकै अध्यक्षतामा सम्पन्न कार्यक्रममा प्रदेश सभा सदस्य शंकर चौधरी, उपाध्यक्ष बबीता सिंह क्षेत्री, प्रमुख प्रशासकीय अधिकृत सन्देश कुमार यादव, वडाध्यक्षहरु नेपाली कुशवाहा, सुभाष यादव, बिहारी महत्तो नुनिया, नेपाली कांग्रेसका नेता वशीष्ठनारायण कुर्मी तथा स्थानीयवासीको उत्साहजनक सहभागिता रहेको थियो।
यसअघि गत वर्ष वडा नं. २ कै रैनीझैनी मठको १५ बिघा अतिक्रमित ऐलानी जग्गा अतिक्रमणमुक्त गरी ७ हजार बढी विरुवा रोपिएको थियो। त्यस्तै, वडा नं. ४ सुहपुर सोहरीस्थित खोला छेउको ९ बिघा ऐलानी जग्गामा १० हजारभन्दा बढी विरुवा रोपेर अहिले घना जंगलसरह विकास भएको अध्यक्ष यादवले बताए।
वन तथा वातावरण संरक्षणमा उल्लेखनीय कार्यका लागि जगरनाथपुर गाउँपालिका हालै संघ सरकारको वन तथा वातावरण मन्त्रालयबाट प्रथम पुरस्कार प्राप्त गरिसकेको छ। गत असार ३० गते मन्त्रालयको रेड कार्यान्वयन केन्द्र, काठमाडौंले १ लाख २५ हजार रुपैयाँसहित गाउँपालिकालाई सम्मान गरेको थियो।
अध्यक्ष यादवका अनुसार, बढ्दो जलवायु संकट, सुख्खा र खडेरीका समस्या समाधानका लागि बोटबिरुवा र वनजंगलको संरक्षण दीर्घकालीन उपाय हो। उनले रोपिएका विरुवाको संरक्षणका लागि घेराबारको व्यवस्था गर्दै निरन्तर अनुगमन गरिने प्रतिबद्धता जनाए।
