वीरगंज । “विद्यालय शिक्षाको मन्दिर हो” भन्ने भनाइलाई समुदायले कार्यद्वारा प्रमाणित गर्दै आएको छ । श्री अजिज मिया माध्यमिक विद्यालय, धोबिनीको एसईई (SEE) र कक्षा १२ को उत्कृष्ट नतिजा तथा शैक्षिक सुधारसँगै विद्यालयप्रति समुदायको सहयोग बढ्दो क्रममा छ।
शुक्रबार आयोजित एक कार्यक्रमबीच धोबिनी निवासी मुना ठाकुरले ११ थान, पटेर्वा सुगौली गाउँपालिका–४ अकवा निवासी विषमोहन चौधरीले १० थान र भिस्वा निवासी किसुनदेव कुमार कलाकारले ५ थान डेस्क–बेन्च विद्यालयलाई हस्तान्तरण गरे।
कार्यक्रममा धोबिनी गाउँपालिकाले एसईई उर्त्तीण र कक्षा १२ पास गरेका विद्यार्थीलाई सम्मान गर्यो भने विद्यालयले सम्पूर्ण शिक्षक, शिक्षिका र विद्यालय कर्मचारीलाई सम्मानपत्र प्रदान गर्यो।
विद्यालयका प्रधानाध्यापक जितेन्द्र रामको अध्यक्षता र गाउँपालिका अध्यक्ष मदन प्रसाद चौहानकाे प्रमुख आतिथ्यतामा भएको कार्यक्रममा शुकुम्बासी समस्या समाधान आयोग पर्साका अध्यक्ष तबरेज अहमद, गाउँपालिका उपाध्यक्षकी प्रतिनिधि श्याम किशोर प्रसाद पटेल, एमालेका नेता सलाउद्दिन अहमद, वडा अध्यक्ष मनौर अहमद, बन्धु साह तेलि, राजकिसोर पटेल, दबेन्द्र पटेल लगायतका शिक्षा प्रेमी, अभिभावक र विद्यार्थीको सहभागिता थियो।
अध्यक्ष तबरेज अहमदले विद्यालयलाई एक वर्ष पुग्ने इंक, मार्कर र डस्टर उपलब्ध गराउने र तत्काल खानेपानीको व्यवस्था आफ्नो पहलमा गर्ने प्रतिबद्धता जनाए । त्यस्तै, गाउँपालिका अध्यक्ष र उपाध्यक्षले यस आर्थिक वर्षमै विद्यालयको अधुरो भवन निर्माण सम्पन्न गर्ने घोषणा गरे।
