वीरगंज । पर्सा जिल्लाको सखुवा प्रसौनी गाउँपालिका–२ कटेया गाउँका दुई घरमा प्रहरीले छापा मार्दा १९१ बोरा सरकारी अनुदानको मल बरामद गरेको छ।
पर्साका प्रमुख जिल्ला अधिकारी (प्रजिअ) गणेश अर्यालको निर्देशनमा बुधवार मध्यरातमा गरिएको कारबाहीमा जिल्ला प्रशासन कार्यालय, जिल्ला प्रहरी कार्यालय, साल्ट ट्रेडिङ कर्पोरेसन र कृषि सामग्री कम्पनी लिमिटेडका प्रतिनिधिहरू सम्मिलित टोली खटिएको थियो।
प्रजिअ अर्यालका अनुसार, साह मोहम्मद अन्सारीको घरबाट डिएपी ९ बोरा, पोटास १८ बोरा र फस्फेट ११४ बोरा गरी १४१ बोरा मल फेला परेको छ। यस्तै, युनुस अन्सारीको घरमा छापा मार्दा डिएपी २७ बोरा र पोटास २३ बोरा गरी ५० बोरा मल बरामद भएको हो। बरामद गरिएको सम्पूर्ण मल जिल्ला प्रहरी कार्यालय पर्सामा राखिएको छ।
प्रहरी उपरीक्षक गौतम मिश्रका अनुसार, मल भण्डारण गर्ने दुवै घरका धनी फरार रहेका र उनीहरूको खोजी जारी छ। पर्सामा हाल धानबालीका लागि मलको तीव्र अभाव भइरहेका बेला किसानका लागि पठाइएको अनुदानको मल अवैध रूपमा भण्डारण गरी कालोबजारी गर्न लागिएको आशङ्का गरिएको छ।
यसअघि प्रजिअ अर्यालले जिल्लाभर मल वितरणमा पारदर्शिता कायम गर्न कृषि सहकारीका सञ्चालक, स्थानीय तहका उपप्रमुख र कृषि शाखा प्रमुखलाई निर्देशन दिएका थिए। सोही निर्देशनअनुसार सुरु गरिएको अनुगमनकै क्रममा कटेयामा ठूलो परिमाणको मल बरामद भएको हो।
