जनकपुरधाम । मधेश प्रदेशको राजधानी जनकपुरधाममा मंगलबार भएको पत्रकारमाथिको नियोजित आक्रमणप्रति समाजवादी प्रेस संगठन नेपाल, मधेश प्रदेश समितिले गम्भीर आपत्ति जनाएको छ।
संगठनका अनुसार २०८२ साउन २७ गते नेपाल पत्रकार महासंघ मधेश प्रदेशका अध्यक्ष श्याम बन्जारा, उपाध्यक्ष ज्योति झा, महासचिव शैलेन्द्र महतो ‘क्रान्ति’, पत्रकार दिवाकर राय, अनिलकुमार गिरी लगायतका सञ्चारकर्मीहरू कानुन व्यवसायीहरूको समूहको आक्रमणमा परी घाइते भएका हुन्। घाइतेमध्ये महासचिव ‘क्रान्ति’को खुट्टा भाँचिएको र पत्रकार साहको टाउकोमा गम्भीर चोट लागेको प्रेस विज्ञप्तिमा उल्लेख गरिएको छ।
संगठनका सचीव प्रमोद चालिसेद्वारा हस्ताक्षरित विज्ञप्तीमर्फत घाइते पत्रकारहरूको शीघ्र स्वास्थ्यलाभको कामना गर्दै संगठनले घटनामा संलग्न सबैलाई तत्काल कानुनी कारबाहीमा ल्याउन आग्रह गरेको छ। प्रेस संगठनले पत्रकारमाथिको आक्रमणलाई प्रेस स्वतन्त्रता मात्र नभई लोकतान्त्रिक मूल्य र मान्यतामाथिको खुला चुनौती भनेको छ।
“पत्रकारको पेशागत कर्तव्य निर्वाहमा अवरोध गर्ने, डर त्रास फैलाउने वा शारीरिक आक्रमण गर्ने कुनै पनि प्रयासलाई समाजवादी प्रेस संगठन कदापि सहने छैन,” विज्ञप्तिमा चेतावनी दिइएको छ। साथै, दोषीलाई उन्मुक्ति दिने प्रवृत्ति दण्डहीनतालाई बढावा दिने भएकाले त्यसविरुद्ध निरन्तर प्रतिरोध गर्ने अडान पनि दोहोर्याइएको छ।
संगठनले घटनाको निष्पक्ष र छिटो छानबिन, दोषीलाई कानुनी दायरामा ल्याउने र प्रदेशभरका पत्रकारहरूको सुरक्षा सुनिश्चित गर्न ठोस योजना तथा कार्यान्वयन सुरु गर्न माग गरेको छ।
यस कठिन घडीमा संगठनले सम्पूर्ण सञ्चारकर्मीहरूसँग ऐक्यबद्धता जनाउँदै आवश्यक परे सामूहिक आन्दोलनको बाटो अपनाउने चेतावनी समेत दिएको छ।
