वीरगंज । पर्साको बहुदरमाई नगरपालिका–२ मा मंगलबार साँझ आगलागी हुँदा एक घर र गोठ पूर्णरूपमा जलेर नष्ट भएको छ भने एक जना घाइते भएका छन्।
मंगलबार साँझ करिब ५:१० बजे स्थानीय राजु रामको फुसको घरमा भैंसीको खोले पकाउन चुलोमा बालेको आगोबाट अचानक आगलागी भएको प्रहरीले जनाएको छ। आगोले फुसको घरसँगै टाँसिएको गोठ समेत जलेर पूर्णरूपमा नष्ट गरेको छ।
घरभित्र रहेका लत्ताकपडा, भाँडावर्तन, अन्नपात र गोठमा राखिएका चौपायामध्ये भैंसीको बच्चा र बाख्रा समेत जलेर मरेका छन्। यस आगलागीमा एक भैंसी पनि मारिएको छ। आगो निभाउने क्रममा घरधनी राजु रामको शरीरका विभिन्न भागमा जलन भएको र उनलाई उद्धार गरी एम्बुलेन्समार्फत नारायणी अस्पताल पठाइएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक किशोर लम्सालले जानकारी दिए। उनका अनुसार उनको तत्कालको अवस्था मध्यम छ।
आगो नियन्त्रणका लागि स्थानीयवासी र प्रहरीको टोली खटिएको थियो। आगो साँझ ६:०० बजे पूर्ण रूपमा नियन्त्रणमा आएको थियो। यस आगलागीबाट करिब ४ लाख ५० हजार रुपैयाँ बराबरको क्षति भएको प्रहरीको अनुमान छ।
