वीरगन्ज । आम जनता पार्टी (आजपा) मधेश प्रदेशका अध्यक्ष उमेश कुशवाहाले प्रसौनी–नकटुवा हुँदै वीरगन्जलाई जोड्ने महत्वपूर्ण सडकको जीर्ण अवस्था र लामो समयदेखि निर्माण कार्य रोकिएको विषयलाई उठाउँदै तत्काल कालोपत्रे गर्न सरकारसँग जोडदार माग गरेका छन्।
उनका अनुसार, सडक निर्माणमा ढिलाइ र अव्यवस्थापूर्ण अवस्थाले स्थानीय बासिन्दा वर्षौँदेखि असुविधा भोगिरहेका छन्। स्थानीय युवाहरूले पटक–पटक आन्दोलन र माग राख्दा पनि कुनै ठोस कदम नचालिएको भन्दै उनले आक्रोश व्यक्त गरे।
अध्यक्ष कुशवाहाले यस क्षेत्रमा प्रतिनिधि सभा सदस्य किसान श्रेष्ठ र प्रदेश सभा सदस्य जितेन्द्र सोनलको असक्षमता र संवेदनशीलताको अभावका कारण सडकको निर्माणमा प्रगति नदेखिएको दाबी गरे। “जनताले भोगिरहेको पीडा बुझ्ने नेतृत्वको कमीले यो सडक अझै कालोपत्र हुन सकेको छैन,” उनले भने।
उनले सडकको खराब अवस्थाका कारण यातायातमा असुविधा, आर्थिक गतिविधिमा अवरोध र दुर्घटनाको जोखिम बढेको उल्लेख गरे। स्थानीय व्यापार र कृषिजन्य उत्पादनको ढुवानीमा समेत गम्भीर समस्या देखिएको उनले बताए।
कुशवाहाले केन्द्र र प्रदेश दुवै सरकारलाई तत्काल बजेट विनियोजन गरी प्रसौनी–नकटुवा–वीरगन्ज सडकलाई प्राथमिकतामा राखी कालोपत्रे गर्न आग्रह गर्दै चेतावनी दिए, “यदि सरकार मौन रह्यो भने जनताको दबाब स्वरूप सडक आन्दोलनमा जान हामी बाध्य हुनेछौँ।”
