वीरगंज । पर्साको जागरनाथपुर गाउँपालिका–४ सोहपुरस्थित मुसहर बस्तीमा पहिलोपटक विद्युत जडान भएपछि स्थानीयवासीको अनुहारमा खुशी झल्किएको छ। प्रविधिको युगमा अझै टुकीको उज्यालामा जीवन बिताउँदै आएका ८३ दलित परिवारका घरघरमा गाउँपालिका कार्यालयले निःशुल्क मीटर जडानसहित विद्युत पुर्याएको हो।
यो पहल गाउँपालिका अध्यक्ष श्रीकान्त प्रसाद यादवको दीर्घ प्रयास र विद्युत प्राधिकरण पोखरिया वितरण केन्द्रको सहयोगमा सम्भव भएको हो। विद्युत विस्तारसँगै मुसहर बस्ती अँध्यारोबाट मुक्त भई उज्यालो र आशाको बस्तीमा परिणत भएको अध्यक्ष यादवले बताए।
“यो केवल उज्यालो मात्र होइन, अवसर र विकासको नयाँ ढोका हो,” अध्यक्ष यादवले कालिका टाईम्ससँग प्रतिक्रिया दिंदै भने। स्थानीयवासीले पनि विद्युतले आफ्नो दैनिकी सजिलो हुने र बालबालिकाको पढाइमा ठूलो सहयोग पुग्ने विश्वास व्यक्त गरेका छन्।
