वीरगंज । आदर्शनगर रंगशालाका संयोजकको जिम्मेवारी पाएका गोपाल प्रसाद खेतानले शुक्रबार प्राविधिक टोली बोलाएर लेबलिङ कार्य र घाँस सरसफाईको काम प्रारम्भ गरेका छन्।
खेतानका अनुसार छिट्टै रंगशालामा फोर टाेलाइट जडान गरिनेछ। उनले भने, “यो रंगशालालाई अन्तर्राष्ट्रिय मापदण्ड अनुसार स्तरोन्नति गर्ने हाम्रो लक्ष्य छ। आवश्यक पूर्वाधार निर्माणपछि यहाँ राष्ट्रिय मात्र होइन, अन्तर्राष्ट्रिय स्तरका खेल प्रतियोगिताहरू आयोजना गर्न सकिनेछ।”
स्थानीय खेलकुदकर्मीहरूले खेतानको नेतृत्वमा रंगशालाको सञ्चालन थप व्यवस्थित र उद्देश्यअनुरूप हुने विश्वास व्यक्त गरेका छन्। उनीहरूका अनुसार पूर्वाधार सुधारसँगै खेलाडीको क्षमता विकासमा सकारात्मक प्रभाव पर्नेछ र रंगशालाले खेलकुद क्षेत्रमा नयाँ सम्भावनाको ढोका खोल्नेछ।
खेलप्रेमीहरूले पनि आवश्यक तयारी पूरा भएपछि आदर्शनगर रंगशाला नेपालकै पहिचान बोकेको प्रमुख खेलस्थल बन्ने अपेक्षा व्यक्त गरेका छन्।
