वीरगंज । वीरगंज महानगरपालिका–१३ स्थित राधेमाई टोलमा घटेको एक विभत्स बलात्कार घटनाले सिङ्गो समाजलाई स्तब्ध बनाएको छ ।
मोटरसाइकल मर्मत पेशामा संलग्न नेक मोहम्मद र अफ्ताब अन्सारी नामका दुई व्यक्तिले एक निर्दोष किशोरीलाई तीन दिनसम्म बन्धक बनाई बसपार्कस्थित एक होटलमा बलात्कार गरेको र त्यसपछि गम्भीर अवस्थामा घडिअर्वा पोखरीको गल्लीमा फालेको घटनाले जनमानसमा गहिरो आक्रोश सिर्जना गराएको छ ।
यस घटनाको विरोधमा राष्ट्रिय समता पार्टी नेपाल, वीरगंज महानगर समितिले नगर संयोजक अमर सर्राफको नेतृत्वमा जिल्ला प्रशासन कार्यालय, पर्सामा ध्यानाकर्षण पत्र बुझाएको छ । पर्साका प्रमुख जिल्ला अधिकारी गणेश अर्यालाई बुझाइएकाे उक्त पत्रमा यो घटना केवल एक चेलीमाथिको हिंसा नभई सम्पूर्ण समाजका चेली–बेटीहरूको अस्मितामाथिको गम्भीर प्रहार रहेको उल्लेख गरिएको छ ।
पार्टीले दोषीहरूमाथि निष्पक्ष र कठोर कानुनी कारबाहीको माग गर्दै, कुनै पनि प्रकारको राजनीतिक संरक्षण, मिलोमतो वा दबाबका आधारमा अपराधीलाई उन्मुक्ति दिने प्रयास भए त्यसको कडा प्रतिवाद गरिने चेतावनी दिएको छ । साथै, आवश्यकता परेमा सडक आन्दोलनमा उत्रनुपर्ने अवस्था आउन सक्ने समेत पार्टीले स्पष्ट पारेको छ।
जिल्ला प्रहरी कार्यालय, पर्साका अनुसार, हाल घटनाबारे विस्तृत अनुसन्धान भइरहेको जानकारी प्राप्त भएको छ । स्थानीयवासी र विभिन्न सामाजिक संघसंस्थाहरूले पनि दोषीलाई कडा सजाय दिन माग गर्दै आवाज उठाएका छन् ।
