वीरगंज । वीरगंजस्थित बालसुधार गृहमा रहेका बालबालिकाहरूलाई आत्मनिर्भर बनाउने उद्देश्यले सानोपाइला संस्थाको आयोजना र कोयष्ट फर्माको आर्थिक सहयोगमा मैनबत्ती बनाउने तालीम सञ्चालन गरिएको छ । सात दिने उक्त तालीमको दोस्रो दिन बुधबार सम्पन्न भएको छ।
तालीम प्रकाश प्रोजेक्ट द्वारा सञ्चालन गरिएको हो । पहिलो चरणमा १५ जना बालकैदी सहभागी भएका छन् । प्रशिक्षक विपिन उपाध्यायले बालबालिकालाई सजावटी मैनबत्ती बनाउने, रंग संयोजन, मोम पगाल्ने प्रविधि लगायतका व्यवहारिक सीपहरू सिकाइरहेका छन्।
कार्यक्रममा प्रकाश प्रोजेक्टकी अध्यक्ष सुशमा गौतम, वडा प्रहरी कार्यालय बिर्ताका प्रहरी प्रमुख निरोज चौलागाईं, सानोपाइला संस्थाका कार्यक्रम संयोजक राजकुमार तामाङ लगायतको उपस्थिति थियो।
प्रकाश प्रोजेक्टकी अध्यक्ष सुशमा गौतमले भनिन् “बालसुधार गृहमा रहेका बालबालिकाहरूले समाजबाट अलग्गिएको महसुस गरिरहेका हुन्छन्। तिनीहरूलाई आत्मविश्वासी बनाउने र जीवनमा सकारात्मक परिवर्तन ल्याउने उद्देश्यले यो तालिम सुरु गरिएको हो।”
उक्त तालिममार्फत बालबालिकामा व्यवहारिक सीपको विकास, आत्मबल अभिवृद्धि, र पुनर्सामाजिकिकरण प्रक्रियामा सहयोग पुग्ने आयोजकहरूको विश्वास छ। आगामी दिनमा थप बालबालिकालाई तालिममा समावेश गरिने पनि बताइएको छ। कार्यक्रमले सुधार र पुनर्स्थापनाको क्षेत्रमा उल्लेखनीय योगदान पुर्याउने अपेक्षा गरिएको छ।
