वीरगंज । पर्सा प्रहरीले वीरगंजबाट अवैध हतियारसहित एक युवकलाई पक्राउ गरेकाे छ । पक्राउ पर्नेमा बिन्दवासिनी गाउँपालिका–५ प्रसौनीभाठा घर भई हाल वीरगंज महानगरपालिका–१६ इनर्वा स्थित ससुरालीमा बस्दै आएका ४० वर्षीय साहेब खाँ रहेका छन्।
जिल्ला प्रहरी कार्यालय पर्साका अनुसार, खाँ कटुवा पेस्तोल बोकी इनर्वा गाउँमा स्थानीयलाई डरत्रास देखाउँदै हिँडिरहेको सूचनाको आधारमा प्रहरी निरीक्षक निरोज चौलागाईंको नेतृत्वमा खटिएको टोलीले उनलाई आइतबार साँझ नियन्त्रणमा लिएको हो । प्रहरीले उनको साथबाट एक थान कटुवा पेस्तोल बरामद गरेको जनाएको छ ।
पर्सा प्रहरीका प्रवक्ता, डिएसपी किशोर लम्सालका अनुसार, खाँविरुद्ध हातहतियार तथा खरखजाना सम्बन्धी मुद्दा दर्ता गरी सात दिनको म्याद थपको अनुमति लिई थप अनुसन्धान अघि बढाइएको छ ।
प्रहरीले यस्ता गतिविधिलाई गम्भीर रुपमा लिएको जनाएको छ र भविष्यमासमेत यस्ता आपराधिक क्रियाकलापमा संलग्न जो-कोहीलाई कडा कारबाही गरिने चेतावनी दिएको छ ।
