वीरगंज । पर्सा जिल्लाको ट्राफिक प्रहरी कार्यालय परिसरमा वातावरण संरक्षण र सौन्दर्यकरणको उद्देश्यले वृक्षारोपण कार्यक्रम सम्पन्न गरिएको छ । कार्यक्रमको नेतृत्व ट्राफिक प्रहरी निरीक्षक लोकराज भट्टले गरेका थिए ।
कार्यक्रम अन्तर्गत कार्यालय हाताभित्र आँप र लिच्चीका गरी करिब ५५ वटा फलफूलका विरुवा रोपिएको जानकारी दिइएको छ । वृक्षारोपणमा ग्रीनसिटी सामुदायिक प्रहरी, आदर्शनगरका अध्यक्ष जय प्रकाश खेतानको विशेष सहयोग रहनुका साथै अन्य प्रहरी कर्मचारीहरूको सक्रिय सहभागिता रहेको थियो ।
इन्स्पेक्टर भट्टले बताएअनुसार, “वृक्षारोपणले कार्यालय परिसरलाई हराभरा र आकर्षक बनाउनुका साथै सेवा लिन आउने सर्वसाधारणलाई पनि सहज वातावरण प्रदान गर्नेछ । साथै, यसले पर्यावरणीय सन्तुलनमा समेत योगदान पुर्याउने विश्वास गरिएको छ।”
कार्यक्रममा जिल्ला ट्राफिक प्रहरी प्रमुख लोकराज भट्ट, प्रहरी बरिष्ठ नायब निरीक्षक गुणनिधि खकुरेल, हवल्दार, सिपाही लगायत अन्य कर्मचारीहरूको उल्लेखनीय उपस्थिति रहेको थियो।
कार्यक्रमले प्रहरी प्रशासन र स्थानीय समुदायबीचको सहकार्यलाई मजबुत बनाएको छ । वृक्षारोपणलाई निरन्तरता दिई फलदायी बनाउन आवश्यक संरक्षण र पालनपोषणको व्यवस्था गर्ने कार्यालयको भनाइ छ ।
यो वातावरणमैत्री पहलले जिल्ला ट्राफिक प्रहरी कार्यालय पर्सालाई नागरिकमैत्री र जिम्मेवार संस्थाका रूपमा स्थापित गर्न थप मद्दत गर्ने विश्वास व्यक्त गरिएको छ ।
