वीरगंज । वीरगंज महानगरपालिका–१० का युवा फुटबल खेलाडी अरनीस गुप्ताले डेनमार्कमा सम्पन्न विश्वप्रसिद्ध अन्तर्राष्ट्रिय फुटबल प्रतियोगितामा सहभागी हुँदै ऐतिहासिक सफलता हासिल गरेका छन् ।
जुलाई २० देखि २७ तारिखसम्म डेनमार्कको होरिङ स्टेडियममा आयोजित प्रतियोगितामा उनले AG10 Academy (Goals Academy) बाट नेपालको प्रतिनिधित्व गर्दै अन्डर–१४ समूहमा टिमलाई समूह विजेता बनाउन महत्त्वपूर्ण भूमिका निर्वाह गरेका हुन्।
फाईनल खेलमा केन्याको LEIT Soccer Academy लाई 3–1 गोल अन्तरले पराजित गर्दै नेपाली टिमले उपाधि जितेको हो। अरनीस गुप्ताले राईट फरवार्डको रूपमा खेल्दै एक निर्णायक गोल गरेका थिए।
उक्त उपलब्धिको कदर गर्दै वीरगंज महानगरपालिकाकाले उनलाई सम्मान गरेकाे छ । आइतबार एक कार्यक्रमका बिच मेयर राजेशमान सिंहदले उनलाई विशेष प्रशंसा पत्र प्रदान गरी सम्मान गरे । कार्यक्रममा नेपाल ईनोभेट सोसाइटीका अध्यक्ष कमल चौगाई, मेयर सिंहका स्वकिय सचिव सत्यराज घिमिरे तथा विभिन्न खेलप्रेमी उपस्थिति रहेको थियो ।
साे अवसरमा बाेल्दै मेयर सिंहले अरनीसको यो सफलता वीरगंज मात्र नभई सम्पूर्ण नेपालको गौरवको विषय भएको बताए । महानगरपालिकाले भविष्यमा पनि यस्ता युवा प्रतिभाहरूको पहिचान, प्रोत्साहन र सम्मानमा निरन्तर साथ दिने प्रतिबद्धता व्यक्त गरे ।
प्रतियोगितामा ब्राजिल, अमेरिका, क्यानडा, मेक्सिको, डेनमार्क, स्पेन, नर्वे, युएईसहित ५० भन्दा बढी देशका २५०० एकेडेमीहरूको सहभागिता रहेको थियो।
