कलैया । आम जनता पार्टी (आजपा)का अध्यक्ष तथा पूर्वमन्त्री प्रभु साहले मधेसलाई राहत प्याकेजबिनै विपद् संकटग्रस्त क्षेत्र घोषणा गर्नु सरकारको गम्भीर लापरवाही र नालायकीपन भएको आरोप लगाएका छन्।
बाराको कलैयास्थित उद्योग वाणिज्य संघको सभाहलमा आजपाद्वारा आयोजित कार्यक्रममा बोल्दै अध्यक्ष साहले जलसंकटग्रस्त मधेसमा राहत र दीर्घकालीन समाधान योजना बिना गरिएको घोषणाले जनतालाई झन बढी पीडामा पारेको बताए।
उनले भने, “सरकारले मधेसमा जलसंकट देखिएपछि आठ जिल्लालाई विपद् संकटग्रस्त क्षेत्र घोषणा त गर्यो, तर आजसम्म कुनै राहत प्याकेज ल्याएको छैन। के सरकारले पीडित जनताको वेदना बुझ्ने प्रयास गरेन? घोषणामात्रै गरेर सरकार जनताको आँखा छलीरहेको छ।”
अध्यक्ष साहले प्रधानमन्त्री केपी शर्मा ओलीको घोषणामाथि पनि प्रश्न उठाउँदै भने, “प्रधानमन्त्री हेलिकप्टरमा सैयर गर्दै आएर पाँच सय डिपबोरिङ गाड्ने प्रतिवद्धता गर्नुभयो, तर ती डिपबोरिङ कहाँ छन् भन्ने कसैलाई थाहा छैन। यो त जनताको भावनासँग भद्दा मजाक हो।”
उनले सरकारलाई तत्काल राहत प्याकेज ल्याउन र पानी समस्या समाधानका लागि दीर्घकालीन योजना अघि बढाउन आग्रह गरे। “चापाकल, इनार सुकेका छन्, जनता पानीको थोपा–थोपा लागि तडपिरहेका छन्। यस्तो गम्भीर समस्यालाई सरकारले हेलचक्राइ गर्नु अत्यन्त दुर्भाग्यपूर्ण छ,” उनले भने।
आजपा बाराका अध्यक्ष राजकिशोर साहकाे अध्यक्षतामा भएकाे कार्यक्रममा पार्टी कार्यलय सदस्य त्रीभुवन साह, मधेश प्रदेश अध्यक्ष उमेश कुशवाहा, पार्टी नेता बिजय यादव, लखिन्द्र साह, पर्सा जिल्ला अध्यक्ष बिशवराज पटेल, पार्टी आयोजक कमिटि सदस्य राकेश बैठा, अरबिन्द साह, अरुण चौधरी, किरण यादव लगाएतकाे सहभागी रहेको थियो ।
