वीरगंज । निजी विद्यालयहरूको छाता संगठन प्याब्सन वीरगंज महानगर समितिले इतिहासमै पहिलो पटक ३२ जना विद्यार्थीलाई प्लस टु तहमा पूर्ण छात्रवृत्ति प्रदान गर्दै ऐतिहासिक र सराहनीय कार्य गरेको छ।
प्याब्सन वीरगंज महानगर अध्यक्ष राहुल श्रीवास्तवकाे अध्यक्षतामा भएकाे कार्यक्रममा वीरगंज महानगरपालिकाका मेयर राजेशमान सिंहले छात्रवृत्तिका लागि सिफारिस पत्र वितरण गरे ।
वीरगंजस्थित हाेटल पुजनमा भएकाे छात्रवृत्ति वितरण समारोहलाई सम्बाेधन गर्दै मेयर सिंहले प्याब्सनको पहललाई अत्यन्त सकारात्मक र प्रेरणादायी भन्दै छात्रवृत्तिलाई शतप्रतिशत निःशुल्क बनाउनु आवश्यक रहेको बताए । “छात्रवृत्ति भनेपछि कुनैपनि शीर्षकमा शुल्क नलिनु पर्छ,” उनले स्पष्ट रूपमा चेतावनी दिए ।
कार्यक्रमका प्रमुख अतिथी समेत रहेका मेयर सिंहले वीरगंजका विद्यालय तथा शिक्षकहरू राजधानी वा अन्य सहरका भन्दा कमजोर नभएको उल्लेख गर्दै गुणस्तरमा अझ ध्यान दिनुपर्ने आवश्यकता औंल्याए । साथै, उनले अभिभावकहरूलाई पनि समयमै शुल्क बुझाउन आग्रह गरे ।
वीरगंज महानगरपालिकाका शैक्षिक प्रशासन महाशाखा प्रमुख आनन्द लामिछानेले वीरगंज मै गुणस्तरीय शिक्षाको वातावरण बनाउने दिशामा प्याब्सनले ऐतिहासिक सुरुवात गरेको बताए । उनले सामुदायिक तथा निजी विद्यालयहरूबीचको समन्वय र शिक्षा गुणस्तरमा सुधारको आवश्यकता औंल्याए ।
प्याब्सन पर्साका अध्यक्ष सरोज चौधरीले वीरगंजकाे शिक्षा क्षेत्रमा यो छात्रवृत्ति कार्यक्रम ऐतिहासिक भएको उल्लेख गर्दै प्याब्सन पर्सा सबै पक्षसँग मिलेर शिक्षाको विकासमा अगाडि बढ्न तयार रहेको बताए ।
प्याब्सन महानगर समितिको नेतृत्वमा आयोजित प्रवेश परीक्षामार्फत छनोट गरिएका छात्रवृत्तिधारी विद्यार्थीहरूलाई अध्ययनका लागि आवश्यक सिफारिस पत्र प्रदान गरिएको हाे । परीक्षामा उत्कृष्ट प्रदर्शन गर्ने विद्यार्थी आयुष सर्राफलाई ल्यापटप, दोस्रो स्थान प्राप्त सागर साहलाई ट्याब तथा संजोग महतो, निराजन प्रसाद र रोशन गुप्तालाई कलेज पोशाक प्रदान गरिएको थियो ।
प्याब्सन वीरगंजका सचिव अमित आलोकले सहजिकरण गरेकाे कार्यक्रममा उपाध्यक्ष शर्मानन्द कुश्वाहाले स्वागत मन्तव्य राखेका थिए । कार्यक्रममा विद्यार्थी, अभिभावक, शिक्षक, विभिन्न संघ/संस्थाका प्रतिनिधि तथा सञ्चारकर्मीहरूको समेत उल्लेख्य उपस्थिति रहेको थियो ।
