वीरगंज । वीरगंज महानगरपालिकाले दीर्घकालीन रूपमा खानेपानी संकट समाधान गर्ने लक्ष्यसहित चुरे क्षेत्रको जलस्रोत संरक्षणका उपायमा चासो देखाएको छ । यसै उद्देश्यले महानगरले अध्ययन र अवलोकन भ्रमण कार्यक्रमको आयोजना गरेको हो ।
राष्ट्रपति चुरे तराई मधेस संरक्षण विकास समितिको सहजीकरणमा वीरगंज महानगरको एक प्रतिनिधि टोलीले बिहिबार जीतपुरसिमरा उपमहानगरपालिका–२१ स्थित अमलेखगञ्जको कर्मकुमारी खानेपानी तथा उपभोक्ता समितिको सफल मोडलको अवलोकन गरेको हो । सो मोडल अन्तर्गत २४ लाख लिटर क्षमताको भूमिगत ट्यांकी निर्माण गरी चुरे क्षेत्रको पानी संकलन, प्रशोधन तथा वितरण गरिएको छ, जसबाट ८८७ घरधुरीले नियमित रूपमा पानी सेवा पाइरहेका छन् ।
वडाध्यक्ष नारायण लामिछाने मगरका अनुसार, खोला क्षेत्रको सतहमा निर्माण गरिएको ट्यांकीबाट ६ इन्चको पाइपमार्फत ५ किलोमिटर टाढा रहेको प्रशोधन केन्द्रसम्म पानी पुर्याइन्छ, जहाँबाट प्रशोधित पानी १ इन्चको पाइपमार्फत उपभोक्तासम्म पु¥याइन्छ।
यस मोडलबाट प्रेरित भएर वीरगंज महानगरले बेलवा क्षेत्रको भेडाहा खोलानजिकै पोखरी तथा बाँध निर्माण गरी बर्सेनि चुरेबाट बग्ने पानीलाई संकलन गर्ने योजना अघि सारेको छ । यसले जमिन मुनिको पानीको तह सुधार्ने र चापाकलमा पानीको उपलब्धता बढाउने विश्वास गरिएको छ।
महानगर प्रमुख राजेशमान सिंहले बताएअनुसार, “अब चुरेको पानी खेर जान दिने छैनौं। संरक्षण गरेर त्यसलाई सदुपयोग गर्ने दीर्घकालीन योजना अघि बढाउँदैछौं।”
कार्यक्रममा चुरे तराई मधेस संरक्षण विकास समितिका अध्यक्ष किरण पौडेल, नगर प्रहरी प्रमुख हरी भुसाल, इन्जिनियर अनिल सिन्हा, विभिन्न कर्मचारी तथा सञ्चारकर्मीहरूको उपस्थिति थियो।
महानगरले चुरे मोडलबाट सिकेर खानेपानीको समस्या समाधान गर्ने आशाजनक संकेत दिएको छ, जसले वीरगंजबासीका लागि दीर्घकालीन राहत ल्याउने अपेक्षा गरिएको छ।
