वीरगंज । शिक्षा, विज्ञान तथा प्रविधि मन्त्रालयले सार्वजनिक सामुदायिक विद्यालयको गुणस्तर अभिवृद्धि गर्ने उद्देश्यले देशभरका उत्कृष्ट विद्यालयहरूमध्येबाट छनोट गर्दै ‘नमुना विद्यालय’ घोषणा गरेको छ । मन्त्रालयद्वारा हालै सार्वजनिक गरिएको सूची अनुसार मधेश प्रदेशका आठवटै जिल्लाबाट ६५ विद्यालय छनोट गरिएका छन्, जसमा पर्सा जिल्लाका ५ र बारा जिल्लाका ७ विद्यालय परेका छन् ।
‘नमुना विद्यालय कार्यक्रम सञ्चालन कार्यविधि, २०८२/८३’ अनुसार आधुनिक पूर्वाधार, प्रविधिमैत्री वातावरण र समावेशी शिक्षाको प्रवर्द्धन गर्ने उद्देश्यले ती विद्यालयलाई उदाहरणीय शिक्षालयको रूपमा विकास गरिनेछ ।
पर्सा जिल्लाबाट वीरगंज महानगरपालिका श्री नृसिंह माध्यमिक विद्यालय, पिपरामठ, पाेखरिया नगरपालिकाकाे श्री जिल्ला उच्चाङ्गल रामदेव कलवार मा.वि., बहुदरमाई नगरपालिकाकाे देवनन्दन देवराज मा.वि., रामनगरी, ठाेरी गाउँपालिकाकाे श्री सरस्वती माध्यमिक विद्यालय, गौतमनगर र सखुवा प्रसाैनी गाउँपालिकाकाे श्री दीपनारायण आदर्श मा.वि., औरहा पर्न सफल भएका छन् ।
यसैगरी बाराबाट जितपुर सिमरा उपमहानगरपालिकाकाे श्री ने.रा. मा.वि., जितपुर, श्री ने.रा. मा.वि., बकुलिया, आदर्शकाेत्वाल गाउँपालिकाकाे श्री रामचरित्र मा.वि., जयनगर, निजगढ नगरपालिकाकाे श्री गौरीशंकर मा.वि., महागढीमाई नगरपालिकाकाे श्री गढीमाई महेन्द्र मा.वि., बरियारपुर, कलैया उपमहागरपालिकाकाे श्री दुर्गा मा.वि. सेवा, बैरिया र काेल्भी नगरपालिकाकाे श्री ने.रा. मा.वि., सपही – कोल्हवी परेकाे छ ।
मन्त्रालयका अनुसार अब यी विद्यालयहरूमा डिजिटल शिक्षण प्रणाली, विज्ञान प्रयोगशाला, पुस्तकालय, खेलमैदान, बालमैत्री शौचालय, सुरक्षित खानेपानी र हरित वातावरण जस्ता पूर्वाधार निर्माणमा प्राथमिकता दिइनेछ।
शिक्षा क्षेत्रको समग्र सुधारको दीर्घकालीन लक्ष्यसहित सरकारले अघि बढाएको यो कार्यक्रमले सार्वजनिक विद्यालयप्रतिको जनविश्वास बढाउने अपेक्षा गरिएको छ। स्थानीय तह, विद्यालय व्यवस्थापन समिति र अभिभावकहरूको सक्रिय सहभागिता पनि कार्यक्रम सफलताको मुख्य आधार मानिएको छ ।
