वीरगंज । सामुदायिक साझेदारी कार्यक्रम अन्तर्गत वीरगंज महानगरपालिका, राष्ट्रपति चुरे तराई मधेश संरक्षण विकास समिति भरतपुर (चितवन) र ग्रिनसिटी सामुदायिक प्रहरी सेवा केन्द्र आदर्शनगर वीरगंजको संयुक्त आयोजनामा बिहिबार वृक्षारोपण कार्यक्रम सम्पन्न भएको छ ।
कार्यक्रम अन्तर्गत वीरगंज महानगरपालिकाकाे वडा नं. १६ स्थित वैष्णवी मन्दिर चौकदेखि नयाँ बसपार्कसम्मको सडक किनारमा ७० भन्दा बढी विभिन्न प्रजातिका बिरुवाहरू रोपिएका छन् । रोपिएका बिरुवाहरूको संरक्षणका लागि लोहाको तारजाली (प्रोटेक्टिभ गार्ड) समेत जडान गरिएको छ ।
ग्रिनसिटी सामुदायिक प्रहरी सेवा केन्द्रका अध्यक्ष जयप्रकाश खेतानको अध्यक्षता र वीरगंज महानगरपालिकाका मेयर राजेशमान सिंहकाे प्रमुख आतिथ्यतामा भएकाे कार्यक्रममा जिल्ला प्रहरी कार्यालय, पर्साका प्रमुख प्रहरी उपरिक्षक गौतम मिश्र, सशस्त्र प्रहरीका प्रहरी उपरिक्षक पुरनचन्द्र भट्ट, ट्राफिक प्रहरी कार्यालय वीरगंजका प्रमुख प्रहरी निरिक्षक लोकराज भट्ट, डा. किरण पौडेल, भारतीय महावाणिज्यदूतावासका डी.एस. मिना लगायत सरोकारवाला निकायका प्रतिनिधिहरूको उल्लेखनीय उपस्थिति रहेको थियो ।
कार्यक्रममा बाेल्दै नगर प्रमुख सिंहले वृक्षारोपण कार्यक्रमलाई हरियाली विस्तार र वातावरण संरक्षणतर्फको दीर्घकालीन प्राथमिकता बताए । “आजको अभियान केवल बिरुवा रोप्ने होइन, समुदाय, प्रहरी र नागरिकको सहकार्यले वातावरणप्रेमको प्रतिबिम्ब पनि हो”, उनले भने ।
कार्यक्रममा स्थानीयबासी, प्रहरी, सामुदायिक सेवा केन्द्रका पदाधिकारी, सञ्चारकर्मी, आजीवन सदस्य तथा अन्य सामाजिक अगुवाहरूको सक्रिय सहभागिता देखिएको थियो ।
