कलैया । विद्यालय शिक्षालाई समावेशी, उत्तरदायी र गुणस्तरीय बनाउन नागरिक समाजको साझा पहल ‘मधेश सिकाइ समूह–२’ ले तयार पारेको सुझावपत्र कलैया उपमहानगरपालिकालाई हस्तान्तरण गरिएको छ। कारखाना समूहअन्तर्गत शिक्षा जवाफदेहिताका लागि क्रियाशील नागरिक समाज संगठनहरूको समूहले आयोजना गरेको दुई दिने कार्यशालाबाट तयार पारिएको सो सुझावपत्र उपमहानगर प्रमुख विनोद प्रसाद साह, उपप्रमुख रोशन प्रविन र शिक्षा शाखा प्रमुख राजीव कुमार यादवलाई हस्तान्तरण गरिएको हो।
नेपालको संविधानले प्रत्याभूत गरेको शिक्षासम्बन्धी मौलिक हकका आधारमा तयार गरिएको सुझावपत्रमा विद्यालय शिक्षा क्षेत्र योजना २०८०/८१ देखि २०८९/९० सम्मको अवधिमा आवश्यक परिमार्जन र सुधारका विश्लेषणात्मक सिफारिसहरू समावेश गरिएको छ। सुझावपत्र तयार पार्ने क्रममा स्थानीय तहको शिक्षा योजना विश्लेषण रूपरेखा र राष्ट्रिय विद्यालय शिक्षा क्षेत्र योजना २०२२/२३–२०३१/३२ का सूचकहरूको समेत अध्ययन र विश्लेषण गरिएको थियो।
सुझावपत्रमा समावेशी शिक्षालाई प्राथमिकता दिनु पर्ने, सिमान्तकृत बालबालिकाका लागि लक्षित बजेट र कार्यक्रम सुनिश्चित गर्नु पर्ने, दिवा खाजा अवधिमा अपाङ्गता भएका बालबालिकाका लागि विद्यालयमा सुरक्षित व्यवस्था गर्नुपर्ने, शिक्षक संख्या र भौतिक पूर्वाधारको सन्तुलन मिलाउनुपर्ने जस्ता विषय उठाइएको छ। साथै, सिपमूलक तथा जीविकोपार्जनमुखी कार्यक्रम सञ्चालन, मानवअधिकारका दृष्टिले शिक्षालाई व्याख्या गर्दै योजना निर्माणमा स्पष्ट समावेश गर्ने, र राष्ट्रिय शिक्षा नीतिसँग अभिसरण हुने गरी स्थानीय योजनामा आवश्यक संशोधन गर्नुपर्ने कुराहरू उल्लेख गरिएको छ।
कार्यक्रममा मधेश सिकाइ समूह–२ का संयोजक निरज मिश्रले प्रस्तुत सुझाव कार्यान्वयनमा आएमा विद्यालय शिक्षाको समावेशिता, गुणस्तर र उत्तरदायित्व थप मजबुत हुने विश्वास व्यक्त गरे। पालिकाका प्रतिनिधिहरूले समेत नागरिक समाजबाट आएका सुझावहरूलाई स्वागत गर्दै आगामी शैक्षिक योजना निर्माणमा सहकार्य गर्ने प्रतिबद्धता जनाएका थिए।
