वीरगंज । निजी तथा आवासीय विद्यालय अर्गनाइजेशन नेपाल (प्याब्सन) पर्साको संगठन विस्तार अभियानअन्तर्गत वीरगंजका दुई निजी विद्यालयहरूलाई नयाँ सदस्यता प्रदान गरिएको छ।
नयाँ सदस्यता प्राप्त गर्ने विद्यालयहरूमा गौतम बुद्ध पब्लिक स्कूल प्रालि, वीरगंज–०१ र ज्ञान वाटिका इङ्गलिस स्कूल प्रालि, वीरगंज–११, पर्सा रहेका छन्।
प्याब्सन पर्साका अध्यक्ष सरोज चौधरीको अध्यक्षतामा साउन ८ गते बसेको जिल्ला कार्यसमितिको ९ औं बैठकले सर्वसम्मत निर्णय गर्दै दुबै विद्यालयलाई प्याब्सनको सदस्यता प्रदान गरेको हो । प्याब्सन वीरगंजको सिफारिसका आधारमा जिल्ला कार्यसमिति मातहत गठन भएको सदस्यता जाँचबुझ तथा सिफारिस समितिका संयोजक इमामुद्दिन अहमदले उक्त विद्यालयहरूको प्रस्ताव बैठकमा प्रस्तुत गरेका थिए।
यससँगै प्याब्सन पर्सामा आबद्ध विद्यालयको संख्या ५३ पुगेको प्याब्सन पर्साका सचिव अशोक संग्रौलाले जानकारी दिए।
प्याब्सन पर्साले विद्यालयहरूको शैक्षिक गुणस्तर अभिवृद्धि, संस्था स्तरीकरण, र संगठन सुदृढीकरणलाई प्राथमिकता दिँदै संगठन विस्तारको अभियान जारी राखेको जनाएको छ।
