काठमाडौं । समाजवादी मोर्चाले हालसम्मका गतिविधिहरू पर्याप्त नभएको निष्कर्ष निकालेको छ । मंगलबार नेकपा (एकीकृत समाजवादी) पार्टीको केन्द्रीय कार्यालय आलोकनगरमा बसेको मोर्चाको बैठकले मोर्चाको कार्यशैली र प्रभावकारिता सम्बन्धी गम्भीर समीक्षा गर्दै आगामी रणनीतिमा सुधार आवश्यक रहेको बताइएको छ।
बैठकपछि मोर्चाका नेता खड्गबहादुर विश्वकर्मा ‘प्रकाण्ड’ ले मुलभूत रूपमा मोर्चा सफल भए पनि अपेक्षित गति लिन नसकेको र जनताका साथै इमानदार कार्यकर्ताहरूका अपेक्षालाई पूर्ण रूपमा सम्बोधन गर्न नसकेको स्वीकार गरे ।
उनले भने, “मोर्चालाई अझ प्रभावकारी बनाएर अघि बढाइएन भने यत्तिका प्रयासको अर्थ हुँदैन । यस विषयमा बैठकमै गम्भीर बहस भयो र सुधारसहित अघि बढ्ने निष्कर्षमा पुगेका छौं।”
बैठकमा समाजवादी मोर्चालाई नयाँ ढङ्गले, तर व्यवहारिक र तार्किक आधारमा विस्तार गर्दै समाजवादी दिशातर्फ अग्रसर गराउने विषयमा छलफल भएको थियो । साथै, भदौको अन्त्यतिर देशव्यापी कार्यक्रमको तयारी गर्ने प्रस्ताव समेत राखिएको छ ।
बैठकले देश वर्तमानमा जटिल र अफ्ठ्यारो परिस्थितिमा रहेको उल्लेख गर्दै, यदि सही ढंगले नेतृत्व र योजना अघि नबढाइए देश गम्भीर संकटमा पर्ने चेतावनी समेत दिएको छ ।
