वीरगंज । बीरगंज महानगरपालिका वडा नं. ६ अन्तर्गत आदर्शनगर क्षेत्रमा बारम्बार भइरहेको आगलागी जोखिम न्यूनीकरणका लागि मंगलबार जथाभावी रहेकाे तारहरु हटाइएकाे छ ।
हिजो हिमालय बैंक नजिकको बिजुली पोलमा लागेको आगोपछि सम्भावित जोखिमलाई ध्यानमा राख्दै नगर प्रहरी प्रमुख हरि भुसाल, सामुदायिक प्रहरी सेवा केन्द्र आदर्शनगरका अध्यक्ष जयप्रकाश खेतान तथा तार व्यवस्थापन टोलीको संयुक्त पहलमा मंगलबार हिमालय बैंकदेखि हनुमान मन्दिरसम्मको क्षेत्रमा अव्यवस्थित तार हटाउने कार्य सञ्चालन गरिएको हो ।
अभियान अन्तर्गत बिजुलीका पोलमा झुन्डिएका पुराना र जथाभावी तारहरू काटेर हटाइएका छन् । नगर प्रहरी स्रोतका अनुसार यस क्रममा करिब १००० केजी बराबरका तारहरू संकलन गरिएका छन्।
नगर प्रहरी प्रमुख हरि भुसालले भने, “जथाभावी छोडिएका तारहरूले जनसुरक्षामा ठूलो खतरा उत्पन्न गर्छन् । हाम्रो लक्ष्य सुरक्षित र व्यवस्थित शहर निर्माण गर्नु हो।”
सामुदायिक प्रहरी सेवा केन्द्रका अध्यक्ष जयप्रकाश खेतानले स्थानीयबासीको सहभागिताले मात्र यस्ता अभियान सफल हुने भन्दै आगामी दिनमा पनि निगरानी र तार व्यवस्थापनलाई निरन्तरता दिइने जानकारी दिए ।
