वीरगंज । वीरगंजवासीको तत्काल खानेपानी समस्या समाधानका लागि जारि रहेकाे बोरिङ जडान कार्य बजेट अभावका कारण राेकिने भएकाे छ ।
खानेपानी तथा ढल व्यवस्थापन कार्यालय वीरगंजका प्रमुख विपुल लाल दासका अनुसार गत आर्थिक वर्ष २०८१/०८२ मा वीरगंजका विभिन्न वडामा ९४ वटा डिप बोरिङ जडान गरिएको थियो । नयाँ आर्थिक वर्ष सुरु भएदेखि पनि वीरगंजकाे विभिन्न वडामा ५० जति बोरिङ जडान भइसकेको छ ।
“तर अब बजेट सुनिश्चितता नभएसम्म थप बोरिङ जडान सम्भव छैन,” प्रमुख दासले स्पष्ट पारे । उनले भने ” उपभोक्ता समितिको माध्यमबाट आवश्यकताका आधारमा बोरिङ गाड्ने कार्य भइरहेको थियो । एउटा बाेरिङ गाड्न उपभाेक्ता समिति मार्फत रु ७ देखि ८ लाख र टेण्डर मार्फत रु ८ देखि १० लाख सम्म खर्च हुने गरेकाे छ । यद्यपि हाल पनि बोरिङको माग उच्च रहेको छ र बजेट सुनिश्चितता नभएका कारण तत्काल थप बाेरिङ गाडने कार्य सम्भव छैन् ।”
खानेपानी तथा ढल व्यवस्थापन कार्यालयकाे अलावा पनि वीरगंज महानगरपालिका र प्रदेश सरकार मार्फत पनि बोरिङ जडान कार्य भइरहेकाे छ । यी निकायबाट हाल सम्म वीरगंजमा कति बाेरिङ जडान भयाे भने तथ्यांक कसैले पनि उपलब्ध गराउन सकेका छैनन् ।
