वीरगंज । मधेश प्रदेश प्रहरी कार्यालय जनकपुरद्वारा आयोजित कार्यसम्पादन सम्झौता मूल्यांकनमा जिल्ला प्रहरी कार्यालय पर्सा सर्वोत्कृष्ट घोषित भएको छ ।
पर्साका प्रहरी प्रमुख प्रहरी उपरीक्षक (एसपी) गौतम मिश्रको नेतृत्वमा प्राप्त यो सफलताको उच्च प्रशंसा गरिएको छ। कार्यसम्पादन सम्झौताको मूल्यांकनमा पर्सा प्रहरीले ९०.१९ प्रतिशत अंकसहित पहिलो स्थान हासिल गरेको हो ।
प्रदेश प्रहरी प्रमुख डीआईजी उमा प्रसाद चतुर्वेदीले जनकपुरमा आयोजित कार्यक्रममा जानकारी दिँदै एसपी मिश्रको नेतृत्वमा अपराध नियन्त्रण, शान्ति सुरक्षा कायम, तथा नीतिगत सुधारको क्षेत्रमा उल्लेखनीय उपलब्धि भएको बताए ।
जिल्ला प्रहरी कार्यालय पर्साले मिश्रको कमान्डमा ६० करोड रुपैयाँ बराबरको चोरी, तस्करी र भन्सार छलीका सामान नियन्त्रणमा लिएको छ। फरार प्रतिवादी पक्राउमा पनि उल्लेखनीय प्रगति गर्दै १,५११ जनालाई पक्राउ गरी ७३ वर्ष २ महिना कैद र झण्डै ३.५५ करोड जरिवाना असुल उपर गरेको छ ।
त्यस्तै, ६२४ केजी चरेस, १,५६१ केजी गाँजा, अफिम लगायत विभिन्न लागुऔषधसहित १५३ जना कारोबारलाई नियन्त्रणमा लिइएको छ। मानव बेचबिखनसम्बन्धी १२ मुद्दा दर्ता गर्दै १३ जना अभियुक्तविरुद्ध कारबाही पनि गरिएको छ ।
प्रहरी उपरीक्षक मिश्रले भौतिक संरचना सुधार, प्रहरी मनोबल वृद्धिका साथै धार्मिक सद्भाव कायम राख्न शान्तिपूर्ण व्यवस्थापनमा समेत दक्षता देखाएका छन् ।
२०७७ सालदेखि सुरु भएको कार्यसम्पादन मूल्यांकनमा पर्सा जिल्ला पहिलो पटक उत्कृष्ट बन्न सफल भएको हो ।
