वीरगंज । वीरगंज महानगरपालिका वडा नं. ८ स्थित पानी टंकीमा रहेको लिटिल बडी प्रि-स्कुलले ‘मम एण्ड मी’ प्रतियोगिता सम्पन्न गरेको छ । स्कुलका प्रिन्सिपल विजय बलको अध्यक्षता र घरेलु तथा साना उद्योग विभागकी रिमा साहको प्रमुख आतिथ्यमा वीरगंजस्थित क्लासिक ब्यांकेटमा कार्यक्रम सम्पन्न भएकाे हाे ।
कार्यक्रमका प्रमुख अथिती साहले यस्ता कार्यक्रमले विद्यार्थीहरूको बौद्धिक तथा भावनात्मक विकासमा महत्वपूर्ण भूमिका खेल्ने बताउँदै, स-साना नानीहरूलाई अभिभावकसँग सँगै सहभागी गराइने कार्यक्रमले प्रेरणा प्रदान गर्ने धारणा व्यक्त गरिन् ।
साे अवसरमा प्याब्सन वीरगंज महानगरका अध्यक्ष राहुल श्रीवास्तवले भने, “विद्यार्थीहरूलाई केवल पढाइ मात्र होइन, उनीहरूको आत्मविश्वास, अभिव्यक्ति र सिर्जनात्मक क्षमताको विकासका लागि यस्ता कार्यक्रम आवश्यक छन्।”
कार्यक्रममा भएकाे डान्स प्रतियोगितामा आठ जोडी सहभागी भएका थिए । साे प्रतियाेगितामा आमा करिश्मा खड्का र छोरी रिधिमा खड्का प्रथम, आमा संगीता चौधरी र छोरी हेजल चौधरी देस्राे र आमा स्मिता कर्ण र छोरा आरब कर्ण तेस्राे भएका थिए ।
कार्यक्रम मै भएकाे फेसन शो प्रतियोगितामा करिब एक सय आमा–सन्तानको उत्साहजनक सहभागिता रहेकाे थियाे । प्रतियाेगिताकाे निर्णायक मण्डलमा रुपसी क्षेत्री र अपेक्षा झा रहेका थिए । कार्यक्रमको सहजीकरण स्वयता साह र एलिसा मिजारले गरेका थिए ।
कार्यक्रममा प्याब्सन वीरगंज महानगर अध्यक्ष राहुल श्रीवास्तव, नेपाल इनोभेटिभ सोसाइटी पर्साका अध्यक्ष कमल चौगाई, बीरगंज युवा समाजका सल्लाहकार माटिन मोक्तान, समाजवादी प्रेस संगठन नेपाल पर्साका अध्यक्ष शम्भु कुमार सुमन, विद्यालय व्यवस्थापन समिति सदस्य सुप्रिया पौडेल, रुचिका श्रीवास्तव, अभिभावक, विद्यार्थी र पत्रकारहरूको उल्लेखनीय उपस्थिति रहेको थियो ।
