वीरगंज । पर्सा जिल्लाको खानेपानी र सिंचाई समस्याको समाधानका लागि आइतबार खानेपानी तथा सिंचाई सम्बन्धि समन्वय र सहजीकरण समितिको बैठकमा सम्पन्न भएकाे छ । जिल्ला समन्वय समितिका प्रमुख निरञ्जन साह सोनारको अध्यक्षतामा बसेकाे बैठक सम्पन्न भएकाे हाे ।
बैठकमा पर्सा जिल्लाको पानी संकट समाधान गर्नका लागि नौ बुँदे निर्णयहरू पारित गरिएका छन् । निर्णय अनुसार हालसम्म जडान गरिएका धारा तथा डिप बोरिङहरूको विवरण संकलन गरिनेछ, खानेपानी अभाव रहेका क्षेत्रको पहिचान गरी त्यहाँ पानी आपूर्तिको अवधारणा पत्र तयार गरिनेछ ।
बैठकले वास्तविक अभाव भएका क्षेत्रमा न्यूनतम ५ हजार लिटर क्षमताका पानी ट्याङ्की जडान गर्ने निर्णय पनि गरेको छ। युनिसेफ नेपाल र जिल्ला समन्वय समिति मिलेर सात दिनभित्र यो कार्य सम्पन्न गर्नेछ ।
त्यसैगरी, विद्यमान डिप बोरिङहरूमा विद्युत आपूर्तिका लागि उपभोक्ता समिति गठन गरी मिटर जडान गरिनेछ । साथै, जहाँ वैकल्पिक स्रोत छैन, त्यहाँ स्थानीय विपद् व्यवस्थापन समितिको सिफारिसमा नयाँ डिप बोरिङ जडान गरिनेछ ।
नेपाल विद्युत प्राधिकरणले खानेपानी तथा सिंचाई प्रयोजनको लागि विद्युत मिटर जडानको निवेदन प्राप्त भएको २४ घण्टा भित्र मिटर जडान गरिसक्नुपर्ने निर्णय समेत गरिएको छ।
खानेपानीको किफायती प्रयोग तथा स्वच्छता प्रवर्द्धन गर्न अभियान सञ्चालन गरिनेछ, जसको समन्वय युनिसेफ नेपालले गर्नेछ । साथै, गण्डक नहरको सरसफाई तथा आवश्यक मर्मतको कार्य आजैदेखि सुरु गरिने निर्णय पनि बैठकले गरेको छ ।
बैठकमा पर्साका प्रमुख जिल्ला अधिकारी गणेश अर्याल, सहायक प्रमुख जिल्ला अधिकारी बाबुलाल रेग्मी, जिल्ला प्रहरी कार्यालय पर्साका प्रमुख प्रहरी उपरिक्षक गाैतम मिश्र, नेपाल विद्युत प्राधिकरण वीरगंज वितरण केन्द्रका प्रमुख अवधेश कुमार दुवे, नेपाल खानेपानी संस्थान वीरगंजका प्रविण कुमार साह, नारायणी सिंचाई व्यवस्थापन कार्यालयका इन्जिनियर सुरेश साह, कृषि ज्ञान केन्द्र पर्साका प्रमुख राम जिवन ठाकुर लगायतकाे उपस्थिति रहेको थियो ।
