वीरगंज । जिल्ला प्रहरी कार्यालय पर्साले २०८२ सालको असार महिनाका लागि प्रहरी सहायक हवल्दार शिवशंकर प्रसाद यादवलाई “उत्कृष्ट प्रहरी (Best Police of the Month)” घोषित गरेको छ।
जिल्ला प्रहरी कार्यालय अन्तर्गत सूचना संकलन शाखामा कार्यरत यादवले कार्यालयले तोकेको जिम्मेवारी तथा पदीय दायित्वलाई इमान्दारीपूर्वक, कर्तव्यनिष्ठ भएर र उच्च व्यावसायिकताका साथ निर्वाह गर्दै आएका छन् ।
चोरी नियन्त्रण, हराएका मोबाइलको खोजतलास, साइबर अपराध अनुसन्धान, लागुऔषध तथा अन्य विभिन्न प्रकृतिका अपराधका घटनाहरूको सफल प्रतिवेदन संकलन, नेटवर्किङ तथा सूचना संकलनमा उनले देखाएको दक्षता र सक्रियता विशेष सराहनीय रहेको कार्यालयले जनाएको छ ।
यादवले समाजमा शान्ति सुरक्षा कायम गर्ने कार्यमा उल्लेखनीय योगदान पुर्याएको मूल्यांकन गर्दै २०८२ सालको असार महिनाका लागि उनलाई उत्कृष्ट प्रहरी घोषणा गरिएको जिल्ला प्रहरी कार्यालय पर्साले जनाएकाे छ ।
जिल्ला प्रहरी कार्यालयका प्रमुख प्रहरी उपरीक्षक गौतम मिश्रले शुक्रबार प्रमाणपत्रमार्फत उनलाई असार महिनाकाे उत्कृष्ट प्रहरीकाे रुपमा सम्मान गरेका हुन् । साे अवसरमा जिल्ला प्रहरी कार्यालय पर्साका प्रवक्ता एवं प्रहरी नायब उपरिक्षक किशाेर लम्सालकाे समेत उपस्थिती रहेकाे थियाे ।
