परवानीपुर । पानी संकट अर्थात विपद् संकटग्रस्त बारा जिल्लाको परवानीपुर गाउँपालिकामा शुक्रबार पुगेका प्रधानमन्त्री केपी शर्मा ओलीले स्थानीय जनताको मुख्य समस्याबारे कुनै प्रतिक्रिया नजनाउँदै फर्किएका छन्।
परवानीपुर गाउँपालिकाकाे प्रशासनिक भवनको उद्घाटन गर्न आएका प्रधानमन्त्री ओलीले आफ्नो सम्बोधनमा विकासका कुराहरू मात्रै उठाए पनि परवानीपुर र आसपासका क्षेत्रका बासिन्दाले झेल्दै आएको पानी संकट, सुख्खा ग्रस्त विपद्सम्बन्धी समस्याबारे भने एक शब्द पनि बोलेनन्।
परवानीपुर र छिमेकी पर्सा जिल्लाका बासिन्दा लामो समयदेखि खानेपानीको अभावले जीवन कष्टकर भएको गुनासो गर्दै आएका छन् । साथै, लामाे समयदेखि पानी नपर्दा धान खेती सुखेकाे र सिचाई अभावमा धान खेती सुख्दै थएकाे छ । यस्ता गम्भीर विषयमा प्रधानमन्त्रीको मौनताले स्थानीय जनता निराश बनेका छन्।
“हामीलाई सडक, भवन भन्दा पहिले खानेपानी र सिचाई चाहिएको हो,” एक स्थानीय बासिन्दाले गुनासो गर्दै भने, “प्रधानमन्त्री आए, तर हाम्रो आवाज नसुनी फर्किए।”
प्रधानमन्त्री ओलीले आफ्नो सम्बोधनमा देश विकासको मार्गमा तीव्र गतिमा अघि बढिरहेको बताए पनि, स्थानीय जनजीवनका तत्कालीन चुनौतीहरूबारे चासो नदिएकोप्रति सामाजिक सञ्जालमा समेत आलोचना भइरहेको छ ।
