वीरगंज । पर्साको सखुवा प्रसौनी गाउँपालिका वडा नं. ५ महुवनस्थित पोखरीमा डुबेर एक जनाको मृत्यु भएको छ। मृत्यु हुनेमा बाराको हर्दिया प्रसौनी निवासी ५० वर्षीय जिरजोधन माझी रहेको प्रहरीले जनाएको छ।
ससुराली आएका माझी मंगलबार दिउँसो करिब ३ देखि ४ बजेको समयमा सम्पर्कविहीन भएका थिए। बुधबार बिहान वडा कार्यालय नजिकै रहेको पोखरीमा एक शव देखेपछि स्थानीयले प्रहरीलाई जानकारी दिएका थिए। सूचना पाउने बित्तिकै इलाका प्रहरी कार्यालय पोखरियाबाट प्रहरी निरीक्षक स्वरुप शर्मा नेतृत्वको टोली घटनास्थलमा पुगेको थियो।
प्रहरीका अनुसार घटनास्थलको मुचुल्का तयार गरी शवलाई परीक्षणका लागि वीरगंजस्थित नारायणी अस्पताल पठाउने तयारी भइरहेको छ। घटनाबारे थप अनुसन्धान भइरहेको प्रहरी निरीक्षक शर्माले जानकारी दिए ।
