वीरगंज । कक्षा ११ र १२ मा अध्ययन गर्न इच्छुक एसईई उत्तीर्ण विद्यार्थीहरूका लागि प्याब्सन वीरगंजले सुरु गर्न लागेको छात्रवृत्ति परीक्षाको सम्पूर्ण तयारी पूरा भएको छ । यस वर्ष पहिलोपटक सञ्चालन हुन लागेको यो छात्रवृत्ति कार्यक्रममा हालसम्म करिब ४५० विद्यार्थीले आवेदन दिएका छन् भने सहभागी संख्या ५ सय नाघ्ने अपेक्षा गरिएको छ।
परीक्षा यही साउन १० गते सञ्चालन हुनेछ । आवेदन अनलाइन माध्यमबाट मागिएको थियो र आवेदन दिने अन्तिम समय साउन ८ गते बिहान १० बजेसम्म तोकिएको छ ।
प्याब्सन वीरगंज महानगर कमिटी र जिल्ला कार्यसमितिको समन्वयमा हुने यो परीक्षामा काठमाडौं लगायत विभिन्न ठाउँका विद्यार्थीहरूले पनि आवेदन दिएका छन् । नगर अध्यक्ष राहुल श्रीवास्तवका अनुसार कार्यक्रम आर्थिक रूपमा कमजोर, सामुदायिक विद्यालयमा अध्ययन गरेका र शैक्षिक रूपमा जेहेन्दार विद्यार्थीलाई लक्षित गरेर ल्याइएको हो ।
परीक्षामा सहभागी हुने विद्यार्थीहरूले आफ्नो प्रवेशपत्र पानीटंकी–१० स्थित लिटिल बडी प्रि-स्कुलबाट परीक्षा समिति सदस्य विजय बलसँग सम्पर्क गरी लिन सक्नेछन् । प्रवेशपत्र छुटेको खण्डमा, परीक्षा सञ्चालन हुने १० वटा कलेजहरूबाट पनि उपलब्ध गराइने नगर सचिव अमित आलोकले जानकारी दिए ।
उनका अनुसार छोटो समयमै उत्साहजनक सहभागिता देखिएकाले आगामी वर्ष छात्रवृत्ति कार्यक्रमलाई अझ व्यवस्थित र व्यापक बनाइनेछ । परीक्षा पूर्णतः मर्यादित, पारदर्शी र व्यवस्थित ढंगले सञ्चालन गरिने जानकारी पनि उनले दिए ।
परीक्षामा अंग्रेजी, नेपाली, गणित र विज्ञान विषयका प्रश्न सोधिनेछ, जसमा अधिकांश कक्षा १० को पाठ्यक्रम समेटिएको परीक्षा समिति सदस्य सुमित कुमार गुप्ताले जानकारी दिए ।
प्याब्सनले मंगलबार आयोजना गरेको पत्रकार भेटघाट कार्यक्रममा जिल्ला कार्यसमिति सदस्य शुलभ केसी, नगर अध्यक्ष राहुल श्रीवास्तव, सचिव अमित आलोक, परीक्षा समिति सदस्य विजय बल र सुमित गुप्ता, प्रेस संयोजक दीपु बर्णवाल तथा नेपाल इनोभेटिभ सोसाइटी पर्साका अध्यक्ष कमल चौधरीको उपस्थिति रहेको थियो ।
