कलैया । बारा जिल्लामा जनमत पार्टीको प्रभाव तीव्र रूपमा बढ्दै गएकाे छ । सोमवार कलैयास्थित करण राज पार्टी प्यालेसमा आयोजित भव्य कार्यक्रममा संविधानसभा सदस्य प्रमोद गुप्ता, मधेस प्रदेशका पूर्व सांसद पारस साह, युवा नेता सुजित पाण्डेय र पाँच वडाका वडा सदस्य पदका उम्मेदवारसहित करिब ७ सय नेता–कार्यकर्ता विभिन्न दल परित्याग गरी जनमत पार्टीमा प्रवेश गरेका छन् ।
पूर्व सांसद पारस साह र गुप्तासहितका नेताहरूले जनता समाजवादी पार्टी (जसपा) नेपाल परित्याग गरेर जनमत पार्टीमा प्रबेश गरेका हुन् । उनीहरूको प्रवेशसँगै बारा जिल्लामा जसपाको सांगठानिक उपस्थिति कमजोर हुँदै गएको र जनमत पार्टी जनस्तरसम्म बलियो बन्दै गएको राजनीतिक विश्लेषकहरू बताउँछन् ।
कार्यक्रममा जनमत पार्टीका केन्द्रीय अध्यक्ष डा. सीके राउतले नयाँ सदस्यहरूलाई पार्टीमा स्वागत गर्दै जनमत पार्टी कुनै ‘०८४ को चुनावी तयारीमा’ नभई ‘पूर्ण अधिकार प्राप्तिको क्रान्ति’का लागि अघि बढिरहेको बताए । उनले कार्यकर्तालाई अधिकार प्राप्तिको आन्दोलनका लागि एकजुट भएर जुट्न आह्वान गरे ।
डा. राउतले संघीयता आए पनि प्रदेशलाई अधिकारविहीन बनाइएको भन्दै त्यसको लागि सिंहदरबारलाई दोषी ठहर गरे । “१० लाख रोजगार दिने भनेका थियौं, तर अधिकार नभएकाले दिन सकिएन,” भन्दै उनले अधिकार र शासन जनमत पार्टीसँग आए मात्र जनताको अपेक्षा पूरा हुने दाबी गरे ।
कार्यक्रममा मधेश प्रदेशका मुख्यमन्त्री सतिश कुमार सिंहले पनि सम्बोधन गर्दै प्रदेश सरकार चाँडै परिवर्तन हुन्छ भन्ने हल्ला निराधार भएको बताएका छन् । उनले १३ महिना पुरा गरेको जनमत नेतृत्वको सरकार जनताका हितमा काम गरिरहेको भन्दै अफवाह फैलाउनेहरू स्वयं संकटमा परेको आरोप लगाए ।
मन्त्री वसन्त कुशवाहा, मन्त्री संजयकुमार यादवसहित जनमत पार्टीका नेताहरूले समेत आफ्नो धारणा राखेका थिए ।
पार्टी प्रवेश गर्दै पूर्व प्रदेशसभा सदस्य पारस साहले जसपा पार्टी नेतृत्वप्रति गम्भीर आरोप लगाउँदै दलित र गरिब परिवारसँग पैसा असुली गरिएको खुलासा गरे ।
कार्यक्रममा नवप्रवेशी नेताहरूलाई पार्टी अध्यक्ष डा. राउत, मुख्यमन्त्री सिंह, मन्त्रीद्वय कुशवाहा र यादवले टिका र गम्छा लगाएर स्वागत गरेका थिए ।
