वीरगंज । वीरगंज महानगरपालिका वडा नं. १९ स्थित तिलावे नदी किनारमा सार्वजनिक जग्गाको संरक्षण र हरियाली प्रवर्द्धनका लागि गरिएको घेराबार तोडफोडमा अज्ञात समूहको संलग्नता देखिएको छ ।
महानगरले हालै गाडेका ८० वटा पोलमध्ये ३४ वटा पोल ढालिएको अवस्थामा फेला परेको छ । महानगरका वातावरण निरीक्षक प्रकाश ऐरको नेतृत्वमा गएको निरीक्षण टोलीले स्थलगत अध्ययनका क्रममा घेराबारमा तोडफोड भएको पुष्टि गरेको हो।
गत असार महिनामै करिब ७ विघा क्षेत्रफल ओगट्ने सो सार्वजनिक जमिनमा वृक्षारोपणको तयारीस्वरूप घेराबार गरिएको थियो। तर, यसअघि सो क्षेत्रको केही भाग केही व्यक्तिहरूले अनधिकृत रूपमा अतिक्रमण गरी निजी प्रयोजनमा प्रयोग गर्दै आएको पृष्ठभूमिमा घेराबार तोडफोड उनीहरूकै मिलोमतोमा भएको हुन सक्ने आशंका गरिएको छ।
“सार्वजनिक सम्पत्तिको संरक्षण र वातावरणीय सुधारका लागि सुरु गरिएको वृक्षारोपण अभियानमा नियोजित अवरोध सिर्जना गरिएको देखिन्छ,” महानगर प्रमुख राजेशमान सिंहले बताए। उहाँले यस्ता आपराधिक गतिविधिमा संलग्न व्यक्तिहरूलाई कानुनी कारबाही गर्न महानगरले स्थानीय प्रशासनमा उजुरी दर्ता गरिसकेको जानकारी दिए।
महानगरले तिलावे नदी किनारमा दीर्घकालीन हरित क्षेत्र विकासको उद्देश्यले वृक्षारोपण कार्यक्रम अघि बढाएको थियो। सार्वजनिक हितमा गरिएका प्रयासमाथि भएको अवरोधप्रति महानगरले कडा आपत्ति जनाउँदै यस्ता कार्यलाई कदापि स्वीकार नगर्ने स्पष्ट पारेको छ।
यस घटनापछि महानगरले स्थायी निगरानी प्रणाली स्थापना गर्ने, सुरक्षात्मक उपायहरू कडाइका साथ लागू गर्ने र नागरिकलाई सार्वजनिक सम्पत्तिको संरक्षणमा सहकार्य गर्न आह्वान गर्ने निर्णय गरेको छ।
