वीरगंज । पर्सा प्रहरीले फरार प्रतिवादी पक्राउमा आक्रामक अभियान सञ्चालन गर्दै न्याय सुनिश्चितताका लागि उल्लेखनीय सफलता हात पारेको छ । विशेष अभियान अन्तर्गत हालसम्म एक हजार ५११ जना फरार प्रतिवादीलाई पक्राउ गरी अदालतको फैसला कार्यान्वयन गरिएको जिल्ला प्रहरी कार्यालय पर्साले जनाएको छ।
पक्राउ परेकामध्येबाट कूल ७३ वर्ष २ महिना कैद सजाय र रू. ३ करोड ५५ लाख १२ हजार ९५६ रुपैयाँ जरिवाना असुल गरिएको छ।
नेपाल तथा भारतका विभिन्न स्थानमा लुकेर बसेका ती प्रतिवादीहरू पक्राउ नपर्दा पीडितहरू न्यायबाट वञ्चित हुने, समाजमा अराजकता र निराशा फैलिने भएकाले प्रहरीको प्राथमिक कार्यका रूपमा फरार पक्राउलाई राखिएको जिल्ला प्रहरी कार्यालय पर्साका प्रमुख प्रहरी उपरिक्षक गौतम मिश्रले बताए।
उनका अनुसार अब कोही पनि राजनीतिक दबाब, सिफारिस वा अन्य बहानामा उम्कन नपाउनेछन्, बाँकी रहेका फरारहरूमाथि पनि कडा निगरानीका साथ यही अभियान जारी रहनेछ ।
मानव बेचबिखन मुद्दामा पनि पर्सा प्रहरीकाे सक्रियता
जिल्ला प्रहरी कार्यालय पर्साले मानव बेचबिखनजस्तो गम्भीर अपराध विरुद्ध पनि कडा कदम चालेको छ । सीमावर्ती जिल्ला भएकाले उच्च जोखिममा रहेको पर्सामा प्रहरी उपरीक्षक गौतम मिश्रको नेतृत्वमा विशेष अभियान सञ्चालन गर्दै पछिल्लो ६ महिनामा १२ वटा मुद्दामा १३ जना प्रतिवादीलाई पक्राउ गरिएको हो।
उनीहरूमध्ये ६ जना कारागार चलान गरिएका छन् भने १३७ जना पीडित तथा जोखिममा रहेका व्यक्तिहरूलाई उद्धार गरी आफन्तको जिम्मा लगाइएको छ ।
अभियानअन्तर्गत होटल, लज, रेस्टुरेन्ट, खाजाघर व्यवसायीहरूसँग सहकार्य गर्दै जनचेतनामूलक कार्यक्रम, स्कूल–कलेजमा ‘अवेयरनेस प्रोग्राम’ सञ्चालन गरिएको र सीमावर्ती नाकाहरूमा कडाइ गरिएको प्रहरीले जनाएको छ ।
यस प्रकारको सक्रियता र प्रतिबद्धताले पर्सा जिल्लामा अपराध नियन्त्रण र न्याय प्रवाहमा उल्लेखनीय प्रगति भएको सरोकारवालाहरूको भनाइ छ ।
