वीरगंज । नेपाल पत्रकार महासंघ मधेश प्रदेशले जनकपुरधाम उपमहानगरपालिका अन्तर्गत श्रीराम मन्दिर गुठीको ४ कट्ठा बहुमूल्य जग्गा प्राप्त गरेको छ। यस जग्गा प्राप्तिसँगै महासंघले अब भव्य भवन निर्माणको प्रक्रिया अगाडि बढाउने जनाएको छ ।
गुठी व्यवस्थापन तथा सरकारी सहयोगमार्फत प्राप्त जग्गा कठिन परिश्रम, लामो प्रक्रिया र निरन्तर प्रयासको प्रतिफलस्वरूप उपलब्ध भएको पत्रकार महासंघ मधेश प्रदेशका अध्यक्ष श्याम बन्जाराले जानकारी दिए । यथार्थमा, उक्त जग्गा प्राप्तिका क्रममा भित्री विरोध र अवरोधहरू आए पनि “पवित्र मनले गरिएको कर्म” सफल भएको उनले बताइएका छन् ।
जग्गा प्राप्तिपछि मधेश प्रदेश सरकारका मुख्यमन्त्री सतीश कुमार सिंह र भौतिक पूर्वाधार मन्त्री सरोज कुमार यादवले भवन निर्माणमा कुनै कञ्जुस्याँई नगर्ने प्रतिबद्धता जनाएकाले महासंघले गहिरो सम्मान व्यक्त गरेको छ।
यस अभियानमा नेपाल पत्रकार महासंघ केन्द्रीय समिति, महासचिव रामप्रसाद दाहाल, केन्द्रीय लेखा संयोजक केसी लामिछाने, सल्लाहकार राजेश कर्ण, प्रेस चौतारीका महासचिव हिरामान लामा, प्रदेश इन्चार्ज अच्युत पौडेल, प्रेस सेन्टरका नेता गोबिन्द देबकोटा, कांग्रेस महामन्त्री गगन थापा लगायतका नेताहरूको सक्रिय भूमिका स्मरणीय रहेको अध्यक्ष बन्जाराले आफ्नाे फेसबुक स्टेटसमा उल्लेख गरेका छन् ।
गुठी केन्द्रीय कार्यालयसम्म पुगी पहल गर्ने उपाध्यक्ष अम्बिका दाहाल, महासचिव शैलेन्द्र क्रान्ति, उपाध्यक्ष ज्योति झा, सचिव हदीश खुदार, कोषाध्यक्ष अनिल गौरव, दिपक गौतिम र सम्पूर्ण कार्यसमिति सदस्यहरूको योगदानप्रति महासंघले उच्च सम्मान प्रकट गरेको छ ।
अब छिट्टै भवन निर्माणको विस्तृत योजना तयार गरी कार्यान्वयनको चरणमा लैजाने तयारी भइरहेको छ। पत्रकार महासंघले यस सफलताका लागि सबै संचारकर्मी, शुभेच्छुक, संघसंस्था र गुठीका कर्मचारीप्रति हार्दिक आभार प्रकट गरेको छ।
यस उपलब्धिले मधेश प्रदेशको पत्रकारिता क्षेत्रको संरचनात्मक विकासमा ऐतिहासिक योगदान पुर्याउने अपेक्षा गरिएको छ ।
