वीरगंज । मधेस प्रदेशका पूर्वप्रदेश प्रमुख राजेश झा (अहिराज) बलात्कारको आरोपमा पक्राउ परेका छन् । काठमाडौँको बानेश्वर क्षेत्रमा एक युवतीमाथि बलात्कार गरेको अभियोगमा उनलाई आइतबार प्रहरीले नियन्त्रणमा लिएको हो ।
जिल्ला प्रहरी परिसर काठमाडौंका एसएसपी विश्व अधिकारीले उनको पक्राउ पुष्टि गरेका छन् । प्रहरीले झालाई पक्राउ गरी आइतबार नै काठमाडौं जिल्ला अदालतमा पेश गरेको थियो । अदालतले अनुसन्धानका लागि पाँच दिनको म्याद थप अनुमति दिएको छ ।
अभियोगअनुसार, २०८१ साल जेठ ४ गते झाले पीडित युवतीलाई आफ्नो कोठामा कोही नभएको अवस्थामा पटकपटक बलात्कार गरेका थिए । साथै, घटनाबारे कसैलाई बताएमा ज्यान मार्ने धम्कीसमेत दिएको युवतीको आरोप छ ।
पीडितले प्रहरीसमक्ष माघ ३ गते औपचारिक जाहेरी दिएकी थिइन् । तर, प्रहरीले त्यसबेला तत्काल पक्राउ प्रक्रिया अघि नबढाएको पाइएको छ । चैत २५ गते मात्र काठमाडौँ जिल्ला अदालतले पक्राउ पुर्जी जारी गरेको थियो । पुर्जी जारी भएलगत्तै झा फरार भएका थिए ।
युवतीले प्रहरीमा जाहेरी दर्ता गराउन खोज्दा पटकपटक अवरोध सिर्जना भएको र अन्ततः कात्तिक २८ गते जिल्ला सरकारी वकिलको कार्यालय, काठमाडौँमा निवेदन दिएपछि मात्र प्रक्रिया अघि बढेको बताइएको छ । सरकारी वकिलको कार्यालयले कात्तिक ३० गते प्रहरीलाई पत्राचार गरेपछि मात्र माघमा औपचारिक जाहेरी दर्ता भएको हो ।
झा २०७७ फागुन ७ देखि २०७८ साउन ३२ सम्म मधेस प्रदेशको प्रमुखको रूपमा कार्यरत थिए । हाल उनी प्रहरी हिरासतमा छन् र घटनाको विस्तृत अनुसन्धान भइरहेको प्रहरीले जनाएको छ ।
