वीरगंज । वीरगंजस्थित नेशनल मेडिकल कलेज एण्ड शिक्षण अस्पतालले पर्साका सशस्त्र प्रहरी उपरीक्षक (एसपी) राधेश्याम धिमाललाई विशेष सम्मानसहित विदाई गरेको छ। समाजमा शान्ति सुरक्षा कायम राख्न तथा सामाजिक उत्तरदायित्व निर्वाहमा उल्लेखनीय योगदान गरेको भन्दै कलेज प्रशासनले उनलाई सम्मानपूर्वक बिदा गरेको हो।
कलेजका अध्यक्ष प्रोफेसर डा. जैनुदिन अन्सारीको अध्यक्षतामा सम्पन्न सो कार्यक्रममा कलेजका प्रबन्ध–निर्देशक सहनवाज अन्सारी, अस्पताल निर्देशक डा. ईसरत जहाँ अन्सारी, एकाडेमी डाइरेक्टर रुबी श्रेष्ठ यास्मिन, प्रधानाध्यापक प्रो. डा. के.एन. सिंह तथा पर्साका विभिन्न सञ्चारमाध्यमका पत्रकारहरूको उपस्थिति रहेको थियो।
कार्यक्रममा वक्ताहरूले एसपी धिमालको कार्यकाललाई स्मरणीय बनाउने खालको बताउँदै वीरगंजको शान्ति सुरक्षामा देखाएको सक्रियता र जनसम्पर्क क्षमताको खुलेर प्रशंसा गरे।
कार्यक्रमको अन्त्यमा एसपी धिमालले आफूलाई सम्मानित गरेबापत कलेज परिवारप्रति आभार प्रकट गर्दै भने, “सामाजिक संस्थाहरूको साथ र सहकार्यले प्रहरी प्रशासनको सेवा अझ प्रभावकारी बन्छ भन्नेमा म विश्वास गर्छु।”
कलेजका प्रेस सल्लाहकार आशिक अन्सारीका अनुसार, धिमालको योगदानको सम्मानस्वरूप यस्तो कार्यक्रम आयोजना गरिएको हो।
