वीरगंज । वीरगंज महानगरपालिका वडा नं. २४ का वडाध्यक्ष विजय प्रसाद कुर्मीले हालको पानी संकटको घडीमा नेतृत्वको उदाहरणीय भूमिका निभाइरहेका छन् । पानीको चरम अभाव भइरहेका बेला अध्यक्ष कुर्मी स्वयं ट्याक्टरको ड्राइभर बनेर वडावासीको घरघरमा पानी पुर्याइरहेका छन् ।
वडामा खानेपानी आपूर्ति अवरुद्ध भएपछि स्थानवासीहरू निकै समस्यामा परेका थिए । यस्तो कठिन परिस्थितिमा वडाध्यक्ष कुर्मीले पहल गर्दै पानी ट्यांकरको व्यवस्थापन मात्र नभई, आफैँ ट्याक्टरको स्टेरिङ समातेर प्रत्यक्ष रूपमा सेवा दिन थालेका छन् ।
“जनताले छटपटी गरिरहँदा म चुपचाप बस्न सक्दिनँ,” अध्यक्ष कुर्मीले भने, “तत्काल समाधान दिन नसके पनि असहज घडीमा साथ दिनु मेरो कर्तव्य हो ।”
स्थानीयवासीहरूले अध्यक्षको यो कदमको खुलेर प्रशंसा गरेका छन् । एक स्थानीय बासिन्दा प्रमिला देवीका अनुसार, “हामीलाई यस्तो नेता भेटिएकोमा गर्व छ, जसले कुर्सी होइन, जनताको पीडा देख्छन् ।”
यस प्रकारको सक्रियता र जनप्रतिनिधिको मानवीय भूमिका अन्य वडाहरूका लागि पनि प्रेरणाको स्रोत बन्ने विश्लेषण गरिएको छ ।
