वीरगंज । पर्सा जिल्लाको वीरगञ्ज महानगरपालिका–२ स्थित श्रीपुरमा आज छवटा कम्युनिस्ट पार्टीहरुको संयुक्त बैठक सम्पन्न भएको छ । बैठकले जिल्लामा कम्युनिस्ट शक्तिको बृहत् विकास, साझा धारणाको निर्माण र आगामी दिनमा मोर्चाबन्दीको सम्भावनालाई लिएर गम्भीर छलफल गरेको छ ।
नेकपा (एकीकृत समाजवादी) पर्साका अध्यक्ष बालगोपाल थापाको अगुवाइमा सम्पन्न उक्त बैठकमा नेकपा (माओवादी केन्द्र)का जिल्ला संयोजक रामदरश कुशवाहा, राष्ट्रिय जनमोर्चाका अच्छेलाल साह, नेपाल मजदुर किसान पार्टीका सरोज साह, वैज्ञानिक समाजवादी कम्युनिस्ट पार्टीका धनबहादुर श्रेष्ठ र नेपाल कम्युनिस्ट पार्टीका फिरोज सिकोको उपस्थिति रहेको थियो ।
बैठकमा स्थानीय, राष्ट्रिय तथा अन्तर्राष्ट्रिय राजनीतिक परिवेशबारे समिक्षा गर्दै साझा धारणा बनाउने र एकअर्काबीच सहकार्यलाई मजबुत बनाउँदै लैजाने सहमति जुटेको छ ।
नेकपा (एकीकृत समाजवादी)का जिल्ला अध्यक्ष थापाका अनुसार विभिन्न विचारधारात्मक विविधताबीच पनि साझा एजेन्डामा सहकार्य गर्दै अघि बढ्न सकिने ठहर बैठकले गरेको छ । आगामी आइतबार पुनः बैठक बस्ने र थप कार्यदिशाबारे निर्णय लिइने जानकारी अध्यक्ष थापाले दिनुभयो ।
