वीरगंज । अख्तियार दुरुपयोग अनुसन्धान आयोगको टोलीले सिरहा जिल्लाको कल्याणपुर नगरपालिकाका नगर प्रमुख राम पुकार साहलाई रु. एक लाख घुससहित रंगेहात पक्राउ गरेको छ।
आयोगका अनुसार वडा नं. ६ मा निर्माण सम्पन्न भएको नाला योजनाको भुक्तानी प्रक्रियामा नगर प्रमुख साहले बिचौलिया मार्फत सेवाग्राहीसँग घुस मागेको सूचना र उजुरीको आधारमा आयोगको बर्दिवास कार्यालयबाट टोली खटिएको थियो। टोलीले नगर प्रमुख साहलाई सेवाग्राहीबाट एक लाख रुपैयाँ घुस लिइसकेको अवस्थामा नियन्त्रणमा लिएको हो ।
घटना स्थलमै पक्राउ परेका साहमाथि थप अनुसन्धान भइरहेको आयोगका प्रवक्ता राजेन्द्र कुमार पौडेलले जानकारी दिएका छन्।
अख्तियारले यस प्रकारका भ्रष्टाचारविरुद्धको कारबाही निरन्तर जारी राख्ने बताउँदै सार्वजनिक पदमा रहेका व्यक्तिहरूले नियमविपरीत सेवा मागेमा तत्काल उजुरी गर्न सेवाग्राहीहरूलाई आग्रह गरेको छ।
