काठमाडौं । खानेपानी मन्त्री प्रदीप यादवको नेतृत्वमा बितेको एक वर्षमा खानेपानी तथा सरसफाई क्षेत्रले ऐतिहासिक फड्को मारेको छ । मन्त्रालयले बुधबार एक कार्यक्रममार्फत नीति, पूर्वाधार र कूटनीतिका क्षेत्रमा हासिल उपलब्धिहरू सार्वजनिक गरेको हो ।
गत वर्ष असार ३१ मा जिम्मेवारी सम्हालेका मन्त्री यादवको नेतृत्वमा मेलम्ची आयोजनाअन्तर्गत रिवर्मा खोलाबाट पानी पथान्तरण सफलतापूर्वक सम्पन्न भई काठमाडौँ उपत्यकामा वर्षभर खानेपानी आपूर्ति सुरु भएको छ। साथै, देशभर ८६ वटा खानेपानी आयोजना सम्पन्न गरी सञ्चालनमा ल्याइएको छ भने पूँजीगत खर्च ८६% पुगेको छ ।
जलवायु परिवर्तनका कारण प्रभावित तराई-मधेशका २५० भन्दा बढी स्थानमा डिप बोरिङ जडान गरिएको छ । वीरगञ्जको दीर्घकालीन समस्या समाधानका लागि ४ अर्ब ५० करोड लागतको योजना कार्यान्वयनमा छ।
नीतिगत रूपमा जनसहभागिता शुल्क ३० प्रतिशतबाट घटाएर १५ प्रतिशतमा झारिएको छ भने, १५ वटा स्थायी कार्यालय स्थापना गरी सेवाप्रवाहलाई संस्थागत गरिएको छ।
भारत सरकार र इसिमोडसँग द्विपक्षीय सहकार्य, तथा संयुक्त राष्ट्रसंघीय कार्यक्रममार्फत नेपालको दीर्घकालीन प्रतिबद्धता प्रस्तुतजस्ता कूटनीतिक सफलतासमेत मन्त्रालयले हासिल गरेको छ।
मन्त्री यादवले भने, “अबको ध्यान दिगो सेवा र दीर्घकालीन पूर्वाधार विकासमा केन्द्रित हुनेछ।” उनका अनुसार मन्त्रालयले सेवा गुणस्तर सुधारसँगै मुलुकभर एकीकृत र प्रभावकारी खानेपानी प्रणाली निर्माणमा प्राथमिकता दिँदै अगाडि बढ्नेछ।
