काठमाडौं । राष्ट्रिय सभा सदस्य भगवती न्यौपाने संघीय मामिला तथा सामान्य प्रशासन मन्त्रीमा नियुक्त भएकी छन्। प्रधानमन्त्री केपी शर्मा ओलीको सिफारिसमा राष्ट्रपति रामचन्द्र पौडेलले मंगलबार न्यौपानेलाई उक्त जिम्मेवारी दिनुभएको हो।
राष्ट्रपति कार्यालयकी प्रवक्ता शैलजा रेग्मी भट्टराईद्वारा जारी विज्ञप्तिमा भनिएको छ, “नेपालको संविधानको धारा ७७ को उपधारा (२) को खण्ड (क) बमोजिम आफ्नो पदबाट सम्माननीय प्रधानमन्त्रीज्यू समक्ष राजीनामा दिनुभएकोले नेपालको संविधानको धारा ७६ को उपधारा (९) बमोजिम सम्माननीय प्रधानमन्त्रीज्यूको सिफारिसमा माननीय श्री भगवती न्यौपानेलाई मन्त्री पदमा नियुक्त गरी संघीय मामिला तथा सामान्य प्रशासन मन्त्रालयको कार्यभार सम्हाल्ने गरी तोक्नु भएको छ।”
न्यौपानेको नियुक्ति तत्कालीन मन्त्री राजकुमार गुप्ताले घुस प्रकरणमा मुछिएपछि राजीनामा दिएसँगै गरिएको हो। गुप्ताले मंगलबार पदत्याग गरेपछि रिक्त रहेको मन्त्रालयको जिम्मेवारी न्यौपानेलाई दिइएको हो।
नवनियुक्त मन्त्री न्यौपानेले संघीय मामिला तथा सामान्य प्रशासन मन्त्रालयमार्फत देशभरिका तीन तहका सरकारबीच समन्वय, प्रशासनिक सुधार र सेवाप्रवाहमा प्रभावकारी भूमिका निर्वाह गर्ने अपेक्षा गरिएको छ।
