काठमाडौं । संघीय मामिला तथा सामान्य प्रशासन मन्त्री राजकुमार गुप्ताले पदबाट राजीनामा दिएका छन् । पछिल्लो समय घुस प्रकरणसँग जोडेर आफ्नो नाम निरन्तर चर्चामा आएको भन्दै गुप्ताले आज प्रधानमन्त्रीसमक्ष राजीनामा बुझाएका हुन्।
राजीनामा पत्रमा गुप्ताले लेखेका छन्, “केही दिनदेखि मेरो नाम घुस डिलसँग जोडेर प्रचारमा आएको सबैलाई विदितै छ। कहिलेकाहीँ नखाएको विष पनि लाग्दो रहेछ, म अहिले त्यसैको शिकार भएको छु।”
गुप्ताले आफूमाथि लागेको आरोपको निष्पक्ष छानबिनका लागि मार्ग प्रशस्त गर्न आफूले मन्त्री पदबाट हात झिकेको बताएका छन्। “अब लागेका आरोपको अनुसन्धान गरी सत्य–तथ्य कुरा बाहिर ल्याउन सहयोग पुगोस् भनेर प्रधानमन्त्रीसमक्ष सामान्य प्रशासन मन्त्री पदबाट राजीनामा दिएको छु,” उनले उल्लेख गरेका छन्।
प्रविधिको दुरुपयोगको शिकार कोही अरू नहोस् भन्ने अपेक्षा व्यक्त गर्दै गुप्ताले आफूसँग अहिलेसम्म सहकार्य गर्ने सबैलाई धन्यवाद पनि दिएका छन्।
राजीनामा पत्रको अन्त्यमा उनले पार्टीप्रतिको प्रतिबद्धता दोहोर्याउँदै भनेका छन्, “अब फेरि एकपटक देश र जनता प्रति थप जिम्मेवारी बोधका साथ पार्टीले दिएको जिम्मेवारी इमान र निष्ठाका साथ पूरा गर्ने प्रतिबद्धताका साथ जनताको घर–दैलोमा आउने प्रण गर्दछु।”
गुप्ताको राजीनामाले देशको राजनीतिक वृत्तमा नयाँ बहसको सुरुवात गराएको छ। हालसम्म उक्त घुस प्रकरणमा आधिकारिक अनुसन्धान अघि नबढेपनि गुप्तको कदमले घटनामा गम्भीरता थपिएको देखिन्छ।
