ओमप्रकाश चाैधरी/
सेढवा । पर्सा राष्ट्रिय निकुञ्जको घना वनक्षेत्र भित्र अवस्थित दुधेश्वर महादेव मन्दिर रामभौरी भाथामा साेमबारदेखि सावण महिनाको पहिलो सोमबारको अवसरमा भव्य सावणी मेला सुरु भएको छ।
तिथि अनुसार सावणको पहिलो सोमबार बिहानैदेखि भगवान शिवको दर्शन र पूजा गर्न हजारौँ भक्तजनहरूको भीड लागेको छ। भारतको बिहार र उत्तर प्रदेशसहित पर्सा, बारा, रौतहट, मकवानपुर र चितवन जिल्लाबाट भक्तजनहरू दर्शनार्थ पुगेका छन्।
भक्तजनहरूले मन्दिरमा जल, फूल, बेलपत्र, प्रसाद तथा अन्य पूजा सामग्री चढाएर शिव आराधना गरेका छन्। मनोकामना पूरा भइसकेपछि अष्ठजामको आयोजना गर्दै विशेष पूजा गर्ने परम्परा यस मन्दिरमा प्रचलित छ।
१७ किलोमिटर जंगलभित्र रहेको मन्दिरमा अहिले गढुवालाईन–चारभौया पोष्ट–रामभौरी भाथा मार्ग मात्रै सञ्चालनमा रहेको सुनाखरी वन समिति सुवर्णपुरका अध्यक्ष भीमबहादुर पाख्रिनले जानकारी दिए। मन्दिरसम्म पुग्ने अर्को मार्गमा जंगली जनावरको सक्रियता बढेकाले त्यसलाई बन्द गरिएको हो।
श्री दुधेश्वर महादेव मन्दिर संरक्षण समितिका अध्यक्ष अलखदेव प्रसाद थारुका अनुसार यस वर्ष विगतको तुलनामा मेला अझ भव्य रूपमा सञ्चालन हुनेछ। सावन महिना भरि व्यापारीहरूले मेला क्षेत्रमै बस्न तथा आवश्यक सामग्री ल्याउन पाउने व्यवस्था मिलाइएको छ।
निकुञ्जको नियम अनुसार भक्तजनहरूले बिहान ६:०० बजेदेखि साँझ ६:३० बजेसम्म मात्र मन्दिर परिसर प्रवेश गर्न पाउने व्यवस्था गरिएको समितिले जनाएको छ।
मन्दिर प्रशासन, पर्सा राष्ट्रिय निकुञ्ज, संरक्षण समिति र स्थानीय निकायहरूको सहकार्यमा मेला शान्तिपूर्ण र व्यवस्थित बनाउन सुरक्षा तथा सेवा व्यवस्थापनमा विशेष ध्यान दिइएको छ।
