वीरगंज । जलवायु परिवर्तनका कारण तराई–मधेस क्षेत्रमा गहिरिँदो पानी संकटलाई दृष्टिगत गर्दै खानेपानी मन्त्री प्रदीप यादव र कानुन, न्याय तथा संसदीय मामिलामन्त्री अजयकुमार चौरसियाले सोमबार पर्सा जिल्लाका विभिन्न स्थानमा विशेष अनुगमन तथा निरीक्षण गरेका छन्।
खानेपानी आपूर्तिमा आइरहेका समस्याहरूको यथार्थ स्थिति अवलोकन गर्न मन्त्रीद्वयले पर्सा निर्वाचन क्षेत्र नं. २ अन्तर्गतका गाउँ, टोल तथा वडाहरूको भ्रमण गरेका हुन्। जलवायु परिवर्तनको प्रतिकूल प्रभावले वीरगञ्ज लगायतको क्षेत्रमा खानेपानी अभाव गम्भीर बन्दै गएको पृष्ठभूमिमा तत्कालीन तथा दीर्घकालीन समाधानका लागि अनुगमन गरिएको हो।
खानेपानीमन्त्री यादवले जनाउँदै भने, “वीरगञ्जमा खानेपानीको दीर्घकालीन समाधानका लागि एशियाली विकास बैंक (एडिबी)को ऋण सहयोगमा ४ अर्ब ५० करोड रुपैयाँ विनियोजन गरिएको छ। साथै, तत्कालीन समस्या समाधानका लागि विभिन्न स्थानमा डिपबोरिङ जडान गरी पानी वितरण कार्य अघि बढाइएको छ।”
साथै कानुनमन्त्री चौरसियाले पनि जनताको आधारभूत आवश्यकता खानेपानी पहुँचको सुनिश्चितताप्रति सरकार गम्भीर रहेको बताउँदै समस्या चाँडै समाधान गरिने प्रतिबद्धता जनाए। “पानीको चरम अभावमा रहेका नागरिकका पीडा बुझ्न र तत्काल कदम चाल्न हामी यहाँ आएका हौँ,” मन्त्री चौरसियाले भने।
मन्त्री यादवका अनुसार नेपाल खानेपानी संस्थानले सरोकारवाला निकायसँग सहकार्य गर्दै समस्या समाधानका लागि आवश्यक कार्यहरू अघि बढाइरहेको छ। उनले स्थानीय जनसमुदायको सहकार्य आवश्यक रहेको पनि उल्लेख गरे।
पानी संकट समाधानका लागि मन्त्रालय सक्रिय रूपमा खटिएको भन्दै दुवै मन्त्रीले अनुगमनक्रममा स्थलगत अध्ययनबाट योजनाबद्ध सुधारको खाका तयार पारिने जानकारी दिए।
